ആലപ്പുഴ: പുന്നപ്ര പഞ്ചായത്തിലെ പറവൂരില്‍ റോഡ് നിര്‍മ്മാണത്തിൻ്റെ ഭാഗമായി ഓടയ്ക്കായി കുഴിച്ച കുഴിയിൽ മതിൽ ഇടിഞ്ഞ് വീണ് ഗുരുതരമായി പരിക്കേറ്റ ബാലചന്ദ്രന്‍റെ കുടുംബത്തിന് പൊതുമരാമത്തു വകുപ്പ് മന്ത്രി ജി സുധാകരൻ അമ്പതിനായിരം രൂപ ധനസഹായം വീട്ടിൽ എത്തി നല്‍കി.
അപകടത്തിൽ മരിച്ച പ്രദീപിന്‍റെ കുടുംബത്തിന് ഒരു ലക്ഷം രൂപയും ബാലചന്ദ്രൻ്റെ കുടുംബത്തിന് അമ്പതിനായിരം രൂപയും നേരത്ത നൽകിയിരുന്നു . ആലപ്പുഴ കൈതവന മുതല്‍ അമ്പലപ്പുഴ ക്ഷേത്രത്തിന്‍റെ വടക്കേ നടവരെയുള്ള 18 കി.മീറ്റര്‍ റോഡ് (പഴയനടക്കാവ് റോഡ്) ആധുനിക രീതിയില്‍ നിര്‍മ്മിക്കുന്ന പ്രവൃത്തിക്കിടയിലാണ് മതിൽ ഇടിഞ്ഞ് വീണ് പ്രദീപ് മരിച്ചതും ബാലചന്ദ്രന് ഗുരുതരമായി പരിക്ക് പറ്റിയതും. സംഭവം നടന്ന അടുത്ത ദിവസം തന്നെ മന്ത്രി സ്ഥലം സന്ദര്‍ശിക്കുകയും കുടുംബാംഗങ്ങളെ ആശ്വസിപ്പിക്കുകയും ചെയ്തിരുന്നു. തുടര്‍ന്നാണ് ധനസഹായം നൽകാൻ തീരുമാനിച്ചത്.