അങ്കമാലി: കോവിഡ് – 19 വ്യാപനം തടയുന്നതിന് മൂക്കന്നൂരില്‍ ശക്തമായ പ്രതിരോധ പ്രവര്‍ത്തനങ്ങള്‍ നടത്തുന്നതിന് നടപടികളായി. പഞ്ചായത്തിന്റെ പതിനാല് വാര്‍ഡുകളിലും വാര്‍ഡ് ജാഗ്രതാ സമിതികള്‍ ചേര്‍ന്ന് വാര്‍ഡുകളെ വിവിധ ക്ലസ്റ്ററുകളായി തിരിച്ച് ശക്തമായ നിരീക്ഷണം നടത്തും.
പത്ത് വയസ്സില്‍ താഴെയുള്ള കുട്ടികളും, വയോജനങ്ങളും കോറന്റയിനില്‍ കഴിയുന്നവരും വീടുകള്‍ വിട്ട് പുറത്തിറങ്ങുന്നില്ലെന്ന് ഉറപ്പ് വരുത്താന്‍ ക്ലസ്റ്റര്‍ തോറും നിരീക്ഷണ സ്‌ക്വാഡുകള്‍ രൂപീകരിക്കും.വ്യാപാരസ്ഥാപനങ്ങളുടെ പ്രവര്‍ത്തനസമയം രാവിലെ 8 മുതല്‍ വൈകീട്ട് 6 വരെയായിരിക്കും. ഞായറാഴ്ചകളില്‍ പഞ്ചായത്തില്‍ സമ്പൂര്‍ണ്ണ ലോക്ഡൗണ്‍ ആചരിക്കും.
താബോര്‍ ഹോളിഫാമിലി ചര്‍ച്ച് പാരിഷ്ഹാളില്‍ കോവിഡ് ഫസ്റ്റ് ലൈന്‍ ട്രീറ്റ്‌മെന്റ് സെന്റര്‍ പ്രവര്‍ത്തന സജ്ജമായി. 60 പേരെ പ്രവേശിപ്പിക്കാവുന്ന സംവിധാനങ്ങളാണ് തയ്യാറാക്കിയിട്ടുള്ളത്. കോവിഡ് ടെസ്റ്റ് റിസള്‍ട്ട് പോസിറ്റീവ് ആകുന്ന കേസുകളില്‍ കോവിഡ് രോഗലക്ഷണങ്ങള്‍ പ്രകടമായി ഇല്ലാത്തവര്‍ക്കും നേരിയ ലക്ഷണങ്ങള്‍ ഉള്ളവര്‍ക്കും ചികിത്സ നല്‍കുന്നതിനുള്ള സംവിധാനങ്ങളാണ് ഫസ്റ്റ് ലൈന്‍ ട്രീറ്റ്‌മെന്റ് സെന്ററില്‍ ക്രമീകരിച്ചിട്ടുള്ളത്.
പഞ്ചായത്ത് പ്രദേശത്ത് 12 പേര്‍ക്കാണ് ഇതുവരെ കോവിഡ് ബാധിച്ചത്. ഇവരില്‍ 2 പേര്‍ നെഗറ്റീവ് ആയി. VII -ാം വാര്‍ഡ് കണ്ടയിന്‍മെന്റ് സോണായി പ്രഖ്യാപിച്ചിട്ടുണ്ട്.
കോവിഡ് – 19 പ്രതിരോധ പ്രവര്‍ത്തനങ്ങള്‍ അവലോകനം ചെയ്യുന്നതിനായി റോജി.എം.ജോണ്‍ എം.എല്‍.എ വിളിച്ചു ചേര്‍ത്ത യോഗം പഞ്ചായത്ത് ഹാളില്‍ ചേര്‍ന്നു.
പ്രസിഡന്റ് ജയ രാധാകൃഷ്ണന്‍ അദ്ധ്യക്ഷത വഹിച്ചു. റോജി എം.ജോണ്‍ എം.എല്‍.എ ഉദ്ഘാടനം ചെയ്തു.ബ്ലോക്ക് പഞ്ചായത്ത് അംഗം ടി.എം. വര്‍ഗ്ഗീസ്, കോണ്‍ഗ്രസ്സ് (ഐ) മണ്ഡലം പ്രസിഡന്റ് ഏല്യാസ് കെ.തരിയന്‍, സി.പി.എം ലോക്കല്‍ സെക്രട്ടറി കെ.എസ് മൈക്കിള്‍, ബി.ജെ.പി പഞ്ചായത്ത് കമ്മിറ്റി പ്രസിഡന്റ് കെ.പി.സോമന്‍, സ്ഥിരം സമിതി അദ്ധ്യക്ഷന്‍ കെ.വി.ബിബീഷ്, മെഡിക്കല്‍ ഓഫീസര്‍ ഡോ.അനുരൂപ് ജോസഫ്, സെക്രട്ടറി കെ.കെ പ്രശാന്ത് എന്നിവര്‍ സംബന്ധിച്ചു.