ഒന്നാം വര്ഷ പോളിടെക്നിക്ക് കോളേജ് പ്രവേശനത്തിന് പെരിയയിലെ കാസര്കോട് ഗവ. പോളിടെക്നിക്ക് കോളേജില് ഒഴിവുള്ള സീറ്റുകളിലേക്ക് രണ്ടാം സ്പോട്ട് അഡ്മിഷന് ഒക്ടോബര് 23 ന് നടക്കും. നിലവില് പെരിയ പോളിടെക്നിക്ക് കോളേജില് പ്രവേശനം നേടി ബ്രാഞ്ച് മാറ്റം ആഗ്രഹിക്കുന്നവര്ക്കും മറ്റേതെങ്കിലും പോളിടെക്കിനിക്ക് കോളേജുകളില് പ്രവേശനം നേടിയവര്ക്ക് ബ്രാഞ്ച് മാറ്റമോ സ്ഥാപന മാറ്റമോ ആഗ്രഹിക്കുന്നവര്ക്കും സ്പോട്ട് അഡ്മിഷനില് പങ്കെടുക്കാം.
റാങ്ക് നമ്പര് 30000 വരെയുളളവര്, ലാറ്റിന് കാത്തലിക്, ധീവര, ടെക്നിക്കല് ഹൈസ്കൂള് എന്നീ സംവരണ വിഭാഗത്തില്പ്പെട്ടവര്, സിവില് എഞ്ചിനീയറിങ്ങിനു അര്ഹതയുള്ള വി.എച്ച്.എസ്.ഇ. വിഭാഗത്തില്പ്പെട്ടവര് 23 ന് രാവിലെ 8.30 നും മുതല് 10.30 നുമിടയില് ഹാജരായി രജിസ്റ്റര് ചെയ്യണം. റാങ്ക് നമ്പര് 40000 വരെയുളള ഈഴവ, വിശ്വകര്മ എന്നീ വിഭാഗക്കാരും മുന്നാക്ക വിഭാഗത്തിലെ സാമ്പത്തിക സംവരണത്തിന് അര്ഹതയുള്ളവരും രാവിലെ 10.30 നും ഉച്ചയ്ക്ക് 12 നുമിടയില് നേരിട്ടെത്തി രജിസ്റ്റര് ചെയ്യണം.
മുസ്ലീം, പട്ടികജാതി എന്നീ വിഭാഗങ്ങളില്പെട്ട മുഴുവന് റാങ്കുകാരും, 35000 റാങ്ക് വരെയുള്ള പിന്നാക്ക ഹിന്ദു വിഭാഗത്തില്പെട്ടവരും ഉച്ചയ്ക്ക് രണ്ടിനകം രജിസ്റ്റര് ചെയ്യണം. സ്പോട്ട് അഡ്മിഷന് പെരിയയിലെ ഗവ. പോളിടെക്കിനിക്ക് കോളേജില് ചേരേണ്ടവര്ക്ക് മാത്രമായുള്ളതാണ്. അര്ഹരായവര് എല്ലാ അസ്സല് സര്ട്ടിഫിക്കറ്റുകളും സഹിതം കോളേജില് നേരിട്ട് ഹാജരാകണം. അനുവദിക്കപ്പെട്ട സമയം കഴിഞ്ഞ് എത്തുന്നവര്ക്ക് അപ്പോള് ലഭ്യമായ സീറ്റിന് മാത്രമെ അര്ഹതയുണ്ടായിരിക്കു.
ഏതെങ്കിലും പോളിടെക്നിക്കില് ഇതിനകം പ്രവേശനം നേടിയ വിദ്യാര്ത്ഥികള് ഫീസ് അടച്ച രസീതും അഡ്മിഷന് സ്ലിപ്പും ഹാജരാക്കണം. പ്രവേശന സമയത്ത് യോഗ്യത തെളിയിക്കുന്ന സര്ട്ടിഫിക്കറ്റുകളുടെ അസ്സല് ഉണ്ടായിരിക്കണം. ടി.സി ഹാജരാക്കുവാന് സമയം അനുവദിക്കും. വാര്ഷിക വരുമാനം ഒരു ലക്ഷം രൂപയില് താഴെയുള്ളവര് 4000 രൂപയും മറ്റുളളവര് 7500 രൂപയും കരുതണം. പി.ടി.എ ഒഴികെയുളള ഫീസ് എ.ടി.എം കാര്ഡ് മുഖേന മാത്രമേ സ്വീകരിക്കുകയുള്ളു. കൂടുതല് വിവരങ്ങള്ക്ക് 9495373926, 9744010202, 8606388025, 9400536858