പുതിയ മേഖലകളിലടക്കം ജൻഡർ ബജറ്റിംഗ് നടപ്പിലാക്കണം: പ്രൊഫ വി.കെ. രാമചന്ദ്രൻ
സ്ഥാപനങ്ങളിൽ ലിംഗാധിഷ്ഠിത ബജറ്റിംഗ് നടപ്പാക്കുന്നത് സംബന്ധിച്ച് സംഘടിപ്പിച്ച സംസ്ഥാനതല ശില്പശാല സംസ്ഥാന ആസൂത്രണ ബോർഡ് ഉപാധ്യക്ഷൻ പ്രൊഫ വി.കെ. രാമചന്ദ്രൻ ഉദ്ഘാടനം ചെയ്തു. പാരമ്പര്യമേഖലകൾക്കൊപ്പം നവീന മേഖലകളിലും ജൻഡർ ബജറ്റിംഗ് നടപ്പിലാക്കണമെന്ന് അദ്ദേഹം അഭിപ്രായപ്പെട്ടു.
ജൻഡർ ബജറ്റിംഗിലൂടെ സ്ത്രീകളുടെ ജീവിത നിലവാരം ഉയർത്തുന്നതിന് പുറമെ സമൂഹത്തിന്റെ മൊത്തത്തിലുള്ള പുരോഗതിയാണ് സാധ്യമാക്കുന്നത്. വനിതാ ശിശു വികസനം, സാമൂഹിക നീതി, ആരോഗ്യം തുടങ്ങിയ മേഖലകളിൽ ജൻഡർ ബജറ്റിംഗ് സാധ്യതകൾ കേരളം മികച്ച രീതിയിൽ പ്രയോജനപ്പെടുത്തുന്നു. ഇതിലൂടെ ദേശീയ തലത്തിൽ സംസ്ഥാനം മറ്റൊരു മികച്ച മാതൃകയാണ് സൃഷ്ടിച്ചത്.
കൃഷി, മൃഗസംരക്ഷണം, ക്ഷീര വികസനം, ശാസ്ത്ര സാങ്കേതികം, മത്സ്യബന്ധനം തുടങ്ങിയ മേഖലകളിലടക്കം ജൻഡർ ബജറ്റിംഗ് നടപ്പിലാക്കണം. തൊഴിൽ, വരുമാനം എന്നതിനൊപ്പം സംരംഭകത്വമുൾപ്പെടെ സാധ്യമാകുന്ന രീതിയിലാകണം ബജറ്റിംഗ്. ഉന്നത വിദ്യാഭ്യാസ മേഖലയിലെ സ്ത്രീ പങ്കാളിത്തം വർധിപ്പിക്കുന്നതിനായുള്ള കാഴ്ചപ്പാടോടെ ബജറ്റിംഗ് വേഗത്തിലാക്കണം. പുതിയ തൊഴിലുകൾ സൃഷ്ടിക്കപ്പെടുന്ന സാഹചര്യത്തിൽ സ്ത്രീ സൗഹൃദമായ സൗഹചര്യങ്ങളായ പ്ലേ സ്കൂളുകളടക്കം വിഭാവനം ചെയ്യണം. ഇത്തരത്തിൽ ഭാവി പ്രവർത്തനങ്ങൾ തിരിച്ചറിഞ്ഞ് പദ്ധതികൾക്ക് തുല്യതയിലധിഷ്ഠിതമായ ബജറ്റിംഗ് ചെയ്യാൻ ശിൽപ്പശാല പ്രേരണയായി മാറുമെന്നും പ്രൊഫ വി.കെ രാമചന്ദ്രൻ പറഞ്ഞു.
തിരുവനന്തപുരം മാസ്ക്കറ്റ് ഹോട്ടലിൽ നടന്ന ചടങ്ങില് ആസൂത്രണ ബോർഡ് അംഗം മിനി സുകുമാർ അധ്യക്ഷത വഹിച്ചു. സോഷ്യൽ സർവീസ് ഡിവിഷൻ ചീഫ് ഡോ. ബിന്ദു പി വർഗീസ് സ്വാഗതമാശംസിച്ചു. ആസൂത്രണ ബോർഡ് മെമ്പർ സെക്രട്ടറി ഡോ.വീണ എൻ മാധവൻ ആമുഖപ്രഭാഷണം നടത്തി. ആസൂത്രണ ബോർഡ് അംഗങ്ങളായ ഡോ. പി.കെ ജമീല, പ്രൊഫ ജിജു പി അലക്സ്, ഡോ. രവി രാമൻ, പ്രൊഫ വറുഗീസ് ജോർജ് എന്നിവർ സംബന്ധിച്ചു.