തച്ചനാട്ടുകര ഗ്രാമപഞ്ചായത്തിന്റെ വാര്ഷിക പദ്ധതിയില് ഉള്പ്പെടുത്തി, ഗ്രാമപഞ്ചായത്തിലെ മുഴുവന് അങ്കണവാടികളിലെയും കുട്ടികളുടെ അമ്മമാര്ക്ക് വൃക്ഷതൈകള് വിതരണം ചെയ്യുന്ന ‘അമ്മക്കൊരു തൈ’ പദ്ധതിക്ക് തുടക്കമായി. ഗ്രാമപഞ്ചായത്ത് പ്രസിഡന്റ് കെ.പി.എം സലീം പരിപാടി ഉദ്ഘാടനം ചെയ്തു. കുഞ്ഞു മക്കളോടുള്ള സ്നേഹവും കരുതലും പോലെ, മണ്ണിനെയും മരങ്ങളെയും സ്നേഹിക്കുകയും പരിചരിക്കുകയും ചെയ്യുക എന്നതാണ് പദ്ധതിയുടെ ലക്ഷ്യം. പദ്ധതിയുടെ ഭാഗമായി ഗ്രാമപഞ്ചായത്തിന് കീഴില് പ്രവര്ത്തിക്കുന്ന 26 അങ്കണവാടികളിലെ മുന്നൂറോളം കുട്ടികളുടെ അമ്മമാര്ക്ക് പേര, ചാമ്പ തുടങ്ങിയ ഫലവൃക്ഷ തൈകള് വിതരണം ചെയ്തു. അങ്കണവാടികളില് പോഷകത്തോട്ടമൊരുക്കുന്ന പദ്ധതിയും ഇതിനോടൊപ്പം ആരംഭിച്ചു.
നാട്ടുകല് അങ്കണവാടിയില് നടന്ന പരിപാടിയില് വൈസ് പ്രസിഡന്റ് പാര്വതി ഹരിദാസ് അധ്യക്ഷയായി. മെമ്പര്മാരായ പി.മന്സൂറലി, സി.പി.സുബൈര്, കെ.പി.ഇല്യാസ്, എ.കെ.വിനോദ്, ഇ.എം.നവാസ്, ഐ സി ഡി എസ് സൂപ്പര്വൈസര് രമാദേവി, ഹെല്ത്ത് ഇന്സ്പെക്ടര് കെ.ബാലകൃഷ്ണന്, ജൂനിയര് ഹെല്ത്ത് ഇന്സ്പെക്ടര് പ്രിയന്, അങ്കണവാടി ജീവനക്കാര്, രക്ഷിതാക്കള് തുടങ്ങിയവര് പങ്കെടുത്തു.