പഴയ ദേശീയ പാതയിലടക്കമുള്ള ഡിവൈഡറുകളിൽ വാഹനാപകടങ്ങൾ ഒഴിവാക്കാൻ മതിയായ റിഫ്ളക്ടറുകൾ സ്ഥാപിക്കാൻ അടിയന്തിര ഇടപെടൽ നടത്തണമെന്ന് ജില്ലാ വികസന സമിതി യോഗം ആവശ്യപ്പെട്ടു. റിഫ്ളക്ടറുകൾ ഇല്ലാത്ത സ്ഥലങ്ങളുടെ ലിസ്റ്റ് പോലീസ് സഹായത്തോടെ ഒരാഴ്ചക്കകം പൊതുമരാമത്ത് വകുപ്പ് തയ്യാറാക്കണം.

ജില്ലയിലെ റോഡുകളുടെ അറ്റകുറ്റ പണികൾ വേഗത്തിലാക്കണമെന്ന് രജിസ്ട്രേഷൻ, മ്യൂസിയം, പുരാവസ്തു പുരാരേഖ വകുപ്പ് മന്ത്രി രാമചന്ദ്രൻ കടന്നപ്പള്ളി യോഗത്തിൽ ആവശ്യപ്പെട്ടു. പൊതുമരാമത്ത് റോഡ് വിഭാഗത്തിന് കീഴിൽ വരുന്ന റോഡുകളിൽ അറ്റകുറ്റപണികൾ പുരോഗമിക്കുന്നുണ്ടെന്നും മഴ മാറിയ ഉടൻ പണികൾ പൂർത്തീകരിച്ച് റോഡുകൾ ഗതാഗതയോഗ്യമാക്കുമെന്നും പൊതുമരാമത്ത് റോഡ്സ് വിഭാഗം എക്സിക്യൂട്ടീവ് എഞ്ചിനീയർ അറിയിച്ചു. ഇതിൽ താൽക്കാലിക പ്രവൃത്തികൾ പൂർത്തീകരിച്ചിട്ടുണ്ട്.

കൂത്തുപറമ്പ് നിയോജക മണ്ഡലത്തിലെ കല്ലിക്കണ്ടി-കടവത്തൂർ-കീഴ്മാടം റോഡ്, നഗരസഭയിലെ റിംഗ് റോഡുകൾ എന്നിവയുടെ നിർമാണ പ്രവൃത്തികൾ സുഗമമാക്കുന്നതിന് ഇവിടെയുള്ള കുടിവെള്ള പൈപ്പുകൾ മാറ്റി സ്ഥാപിക്കണമെന്ന് കെ.പി മോഹനൻ എം എൽ എ ആവശ്യപ്പെട്ടു. മലബാർ റിവർ ക്രൂയിസ് ടൂറിസം പദ്ധതിയുടെ ഭാഗമായി മയ്യഴിപ്പുഴയിലെ ബോട്ട് ജെട്ടികളുടെ തുടർപ്രവർത്തനം, പുഴയുടെ ആഴം വർധിപ്പിക്കൽ, പെരിങ്ങത്തൂർ-കരിയാട് ബോട്ട് ജെട്ടികളുടെ ഉദ്ഘാടനം എന്നീ പ്രവൃത്തികൾ വേഗത്തിലാക്കണമെന്നും എം എൽ എ പറഞ്ഞു.

തളിപ്പറമ്പ്, പയ്യന്നൂർ താലൂക്കുകളിലെ ദേവസ്വം ഭൂമിക്ക് ജന്മം പതിച്ചു നൽകുന്നതിനുള്ള അപേക്ഷകളിന്മേൽ വിചാരണ നടപടികൾ പുരോഗമിക്കുന്നുണ്ടെന്നും സമയബന്ധിതമായി തീർപ്പുകൽപ്പിക്കാനുള്ള നടപടികൾ സ്വീകരിച്ചു വരുന്നുണ്ടെന്നും ഡെപ്യൂട്ടി കലക്ടർ എൽ.ആർ അറിയിച്ചു.

ചെറുപുഴ ഗ്രാമപഞ്ചായത്തിലെ എയ്യൻകല്ല് അംബേദ്കർ സെറ്റിൽമെന്റ് പദ്ധതിയിൽ ഗ്രാമപഞ്ചായത്തിനെ നിർവഹണ ഏജൻസിയായി നിശ്ചയിക്കാൻ അംഗീകാരം ലഭ്യമാക്കാൻ പട്ടികവർഗ വികസന വകുപ്പ് ഡയറക്ടർക്ക് കത്ത് നൽകിയതായി ഐ ടി ഡി പി പ്രൊജക്ട് ഓഫീസർ അറിയിച്ചു.

2017-18 അംബേദ്കർ സെറ്റിൽമെന്റിൽ ഉൾപ്പെട്ട 17 ഉന്നതികളിൽ ഹാബിറ്റാറ്റ് മുഖേനെ നിർവഹണം നടത്തിയ പ്രവൃത്തികൾ പരിശോധിക്കാനുള്ള ജില്ലാതല ടെക്നിക്കൽ കമ്മിറ്റിയുടെ റിപ്പോർട്ട് സ്വീകാര്യമല്ലെന്ന് ഏജൻസിയെ അറിയിച്ചതായി ഐടിഡിപി പ്രൊജക്ട് ഓഫീസർ അറിയിച്ചു. ജില്ലാതലത്തിൽ ആവശ്യപ്പെട്ട മറുപടി ലഭ്യമാകാതെ ഏജൻസിക്കുള്ള തുക അനുവദിക്കില്ല.

ആറളം ഒൻപതാം ബ്ലോക്കിലെ എൽ പി സ്‌കൂൾ കെട്ടിടം വിദ്യാഭ്യാസ വകുപ്പ് ഏറ്റെടുക്കുന്നതുവരെ ട്രൈബൽ കമ്യൂണിറ്റി മാനേജ്മെന്റ് ട്രെയിനിംഗ് സെന്ററായി ഉപയോഗിക്കാൻ കുടുംബശ്രീ മിഷന് താൽക്കാലിക അനുമതി നൽകിയതായി ഐടിഡിപി പ്രൊജക്ട് ഓഫീസർ അറിയിച്ചു.

ചിറ്റാരിപ്പറമ്പ്-കോളയാട് ഗ്രാമപഞ്ചായത്തുകളെ ബന്ധിപ്പിക്കുന്ന തീരായം പാലം നിർമാണത്തിന് ഇൻവെസ്റ്റിഗേഷൻ പ്രവൃത്തിക്കായുള്ള 5,65,000 രൂപയുടെ എസ്റ്റിമേറ്റ് ഭരണാനുമതിക്കായി ഐ ടി ഡി പി വകുപ്പിന് സമർപ്പിച്ചിട്ടുണ്ടെന്ന് പൊതുമരാമത്ത് പാലങ്ങൾ വിഭാഗം അസി. എഞ്ചിനീയർ അറിയിച്ചു.

കൂത്തുപറമ്പ് നിയോജക മണ്ഡലത്തിൽ എം എൽ എയുടെ എ ഡി എസ്, എസ് ഡി എഫ് പദ്ധതിയിൽ ഉൾപ്പെടുത്തി സ്ഥാപിക്കുന്ന മിനിമാസ്റ്റ് ലൈറ്റുകളുടെ പ്രവൃത്തി പുരോഗമിക്കുകയാണെന്ന് അസി. എക്സിക്യൂട്ടീവ് എഞ്ചിനീയർ അറിയിച്ചതായി എൽ എസ് ജി ഡി ജോയിന്റ് ഡയറക്ടർ റിപ്പോർട്ട് ചെയ്തു.

പടന്നക്കര-തലശ്ശേരി (വഴി) പള്ളിക്കുനി, മോന്താൽ-മേക്കുന്ന്-ചൊക്ലി, മഞ്ഞോടി റൂട്ടിൽ അഞ്ച് വർഷത്തേക്ക് ബസ് റൂട്ടിന് സ്ഥിരം പെർമിറ്റ് അനുവദിക്കുന്നതിനുള്ള അപേക്ഷ ആർ ടി ഒ യോഗത്തിൽ പരിഗണിച്ചതായും രേഖകൾ ഹാജരാക്കിയാൽ ടൈമിംഗ് നടത്തി പെർമിറ്റ് നൽകുമെന്നും ആർ ടി ഒ അറിയിച്ചു.

തലശ്ശേരി താലൂക്ക് പെരിങ്ങളം വില്ലേജ് അണിയാരം ദേശത്ത് അന്യംനിന്നുപോയ 0.2347 ഹെക്ടർ ഭൂമി സർക്കാരിലേക്ക് ഏറ്റെടുക്കാൻ ഉത്തരവായിട്ടുണ്ടെന്ന് ഡെപ്യൂട്ടി കലക്ടർ എൽ ആർ അറിയിച്ചു. ഇത് താലൂക്ക്/ വില്ലേജ് റിക്കാർഡുകളിൽ റവന്യൂ ഭൂമിയാക്കി മാറ്റുന്നതിനും പ്രത്യേകം തയ്യാറാക്കി സൂക്ഷിക്കുന്നതിനുമുള്ള നടപടികൾ പുരോഗമിക്കുകയാണ്. സർവെ സബ്ഡിവിഷൻ നടപടികൾക്കായി ഗസറ്റ് വിജ്ഞാപനം ചെയ്തിട്ടുണ്ട്. ഇത് മൂന്ന് മാസത്തിനകം പൂർത്തീകരിക്കും.

മലയോര മേഖലയിലെ ബി എസ് എൻ എൽ മൊബൈൽ കണക്ടിവിറ്റി പ്രശ്നങ്ങൾ പരിഹരിക്കാൻ യു എസ് ഒ എഫ് 4 ജി സാച്ചുറേഷൻ പ്രൊജക്ട് വഴി ടവർ സ്ഥാപിക്കാനുള്ള നടപടികൾ സ്വീകരിച്ച് വരികയാണെന്ന് ബി എസ് എൻ എൽ ജനറൽ മാനേജർ അറിയിച്ചു. ഗ്രാമപ്രദേശങ്ങളിലെ കവറേജ് വർധിപ്പിക്കാൻ പദ്ധതിയിൽ ഉൾപ്പെടുത്തി 24 പുതിയ ടവറുകൾ സ്ഥാപിച്ചിട്ടുണ്ട്. 17 പുതിയ ടവറുകൾകൂടി സ്ഥാപിക്കാൻ ഉന്നത സമിതിക്ക് നൽകിയ പ്രൊപ്പോസൽ പരിഗണനയിലാണ്. ആറ് മാസത്തിനുള്ളിൽ 37 സ്ഥലങ്ങളിൽ പുതിയ ബാറ്ററി സെറ്റുകൾ സ്ഥാപിച്ചിട്ടുണ്ട്. 34 സ്ഥലങ്ങളിൽ ബാറ്ററി സെറ്റുകളും 65 ഇടങ്ങളിൽ പുതിയ പ്ലാന്റുകൾ സ്ഥാപിക്കുന്ന പ്രവൃത്തിയും നടക്കുകയാണ്. ഇതോടൊപ്പം 284 സ്ഥലങ്ങളിൽ പുതിയ ബാറ്ററി സെറ്റുകളും 54 ഇടങ്ങളിൽ പുതിയ പവർപ്ലാന്റുകളും സ്ഥാപിക്കാൻ ഉന്നത സമിതിയോട് ആവശ്യപ്പെട്ടിട്ടുണ്ട്. മൂന്ന് മാസത്തിനകം ഇത് വിതരണം ചെയ്യും.

കൊട്ടിയൂർ ശിവക്ഷേത്രത്തിലെ ഉത്സവ സമയത്തുണ്ടാകുന്ന ഗതാഗതക്കുരുക്ക്, അടിസ്ഥാന സൗകര്യങ്ങൾ, മെഡിക്കൽ സൗകര്യം വർധിപ്പിക്കൽ എന്നിവയ്ക്കുള്ള പരിഹാരമായി വിവിധ വകുപ്പുകളിൽ നിന്നുള്ള റിപ്പോർട്ടിന്റെ അടിസ്ഥാനത്തിൽ സർക്കാരിലേക്ക് സമർപ്പിക്കാനായി അന്തിമ കരട് ആക്ഷൻ പ്ലാൻ തയ്യാറാക്കിയതായി സബ് കലക്ടർ അറിയിച്ചു.

പാട്യം വില്ലേജ് ഓഫീസിന് പുതിയ കെട്ടിടം നിർമിക്കാൻ കണ്ടെത്തിയ പഴശ്ശി ജലസേചന പദ്ധതിയുടെ സ്ഥലം സംബന്ധിച്ച ഭൂമി കൈമാറ്റ പ്രൊപ്പോസൽ ലാൻഡ് റവന്യൂ കമ്മീഷണർക്ക് സമർപ്പിച്ചതായി ഡെപ്യൂട്ടി കലക്ടർ എൽ ആർ അറിയിച്ചു.

പയ്യന്നൂർ നിയമസഭാ മണ്ഡലത്തിൽ ജലജീവൻ മിഷൻ, ടെലിഫോൺ കമ്പനികൾ പൈപ്പ് സ്ഥാപിക്കുന്നതിന്റെ ഭാഗമായി എടുത്ത കുഴികൾ മൂടിയ റോഡുകൾ നന്നാക്കുന്ന പ്രവൃത്തികൾ പുരോഗമിക്കുകയാണെന്ന് പൊതുമരാമത്ത് നിരത്തുകൾ വിഭാഗം എക്സിക്യൂട്ടീവ് എഞ്ചിനീയർ അറിയിച്ചു. ചിലയിടങ്ങളിൽ കോൺക്രീറ്റ് പ്രവൃത്തികളും ആരംഭിച്ചിട്ടുണ്ട്.

സബ് കലക്ടർ കാർത്തിക് പാണിഗ്രഹി അധ്യക്ഷനായി. രജിസ്ട്രേഷൻ, മ്യൂസിയം, പുരാവസ്തു പുരാരേഖ വകുപ്പ് മന്ത്രി രാമചന്ദ്രൻ കടന്നപ്പള്ളി, കെ.പി മോഹനൻ എം എൽ എ, എ ഡി എം കലാഭാസ്‌കർ, ജില്ലാ പ്ലാനിംഗ് ഓഫീസർ നെനോജ് മേപ്പടിയത്ത്, വകുപ്പ് മേധാവികൾ എന്നിവർ സംസാരിച്ചു