സേവനപാതയിൽ 131 വർഷങ്ങൾ പൂർത്തീകരിച്ച് തൃശ്ശൂർ മാനസികാരോഗ്യ കേന്ദ്രം. വാർഷിക ആഘോഷ ഉദ്ഘാടനം മാനസികാരോഗ്യ കേന്ദ്രം അങ്കണത്തിൽ കോർപ്പറേഷൻ മേയർ അജിത ജയരാജൻ നിർവഹിച്ചു. ജില്ലാ പഞ്ചായത്ത് പ്രസിഡന്റ് മേരി തോമസ് അധ്യക്ഷയായി.

14 ഏക്കർ സ്ഥലത്ത് കൊച്ചി മഹാരാജാവ് 1889 ൽ പടിഞ്ഞാറെ കോട്ടയിൽ സ്ഥാപിച്ചതാണിത്. പൊതു സമൂഹത്തിന്റെ ശ്രദ്ധയും പരിചരണവും ഏറെ ലഭിക്കേണ്ട മാനസിക രോഗികൾക്കാവശ്യമായ കരുതലും സ്നേഹവും ആധുനിക ചികിത്സയും ഈ ആതുരാലയത്തിൽ നൽകുന്നു.

വാർഷികാഘോഷത്തിന്റെ ഭാഗമായി ഈ കേന്ദ്രത്തിലെ അന്തേവാസികൾ, കൂട്ടിരുപ്പുകാർ, ജീവനക്കാർ, കുടുംബാംഗങ്ങൾ എന്നിവർക്ക് വേണ്ടി വിവിധ കലാപരിപാടികൾ അവതരിപ്പിച്ചു. സ്റ്റാഫ് അംഗങ്ങളും, സൊസൈറ്റി ഫോർ ഒക്കുപ്പേഷണൽ തെറാപ്പി യൂണിറ്റും സംയുക്തമായാണ് കലാപരിപാടികൾ സംഘടിപ്പിച്ചത്.

ജില്ലാ കളക്ടർ എസ് ഷാനവാസ്, ഡെപ്യൂട്ടി ഡി എം ഓ ഡോ വി കെ മിനി, മാനസികാരോഗ്യ കേന്ദ്രം സൂപ്രണ്ട് ഡോ ടി ആർ രേഖ, സീനിയർ കൺസൾട്ടന്റ് ഡോ എസ് വി സുബ്രമണ്യൻ, സൊസൈറ്റി ഫോർ ഒക്കുപ്പേഷണൽ തെറാപ്പി ആൻഡ് റീഹാബിലിറ്റേഷൻ പ്രസിഡന്റ് കെ രാധാകൃഷ്ണൻ, എച്ച് എം സി അംഗങ്ങളായ വിശാലാക്ഷി, ബാലസുന്ദർ തുടങ്ങിയവർ പങ്കെടുത്തു.