മികച്ച ഭിന്നശേഷി ജീവനക്കാർക്കും, തൊഴിൽ ദായകർക്കും, ഭിന്നശേഷി ക്ഷേമ രംഗത്ത് മികച്ച സേവനം കാഴ്ച വെച്ച സ്ഥാപനങ്ങൾക്കുമുള്ള 2020ലെ സംസ്ഥാന അവാർഡുകൾക്ക് സാമൂഹ്യ നീതി വകുപ്പ് അപേക്ഷ ക്ഷണിച്ചു. തദ്ദേശ സ്വയംഭരണ സ്ഥാപനങ്ങൾ ഉൾപ്പെടെയുള്ള കേന്ദ്ര-സംസ്ഥാന സർക്കാർ വകുപ്പുകൾ, പൊതുമേഖലാ സ്ഥാപനങ്ങൾ, സഹകരണ സ്ഥാപനങ്ങൾ, സ്വകാര്യ മേഖലാ സ്ഥാപനങ്ങൾ എന്നിവയിൽ ജോലി ചെയ്തുവരുന്ന കാഴ്ച-കേൾവി-സംസാര പരിമിതിയുള്ളവർ, അസ്ഥിസംബന്ധമായ വൈകല്യമുള്ളവർ, മാനസിക വെല്ലുവിളികൾ നേരിടുന്നവർ, ബുദ്ധി വൈകല്യം സംഭവിച്ചവർ എന്നീ വിഭാഗങ്ങളിൽപ്പെട്ട ഭിന്നശേഷി ജീവനക്കാർക്ക് അവാർഡിനായി അപേക്ഷിക്കാം.

മുൻവർഷങ്ങളിൽ സംസ്ഥാന അവാർഡ് ലഭിച്ചിട്ടുള്ളവർ വീണ്ടും അപേക്ഷിക്കേണ്ടതില്ല. ക്യാഷ് അവാർഡും സർട്ടിഫിക്കറ്റും ചേർന്ന അവാർഡിന് നിശ്ചിത ഫോറത്തിൽ പൂരിപ്പിച്ച അപേക്ഷ സമർപ്പിക്കണം. അപേക്ഷകന്റെ ഔദ്യോഗികരംഗത്തെ പ്രവർത്തനം, മറ്റ് പ്രവർത്തന മണ്ഡലങ്ങളെ സംബന്ധിച്ച വിവരങ്ങൾ/കഴിവുകൾ വ്യക്തമാക്കുന്ന സിഡി, വൈകല്യം തെളിയിക്കുന്നതിനുള്ള രേഖകൾ, പാസ്പോർട്ട് സൈസിലും ഫുൾ സൈസിലുമുള്ള ഫോട്ടോകൾ എന്നിവ സഹിതം ഒക്ടോബർ 31നു മുൻപ് ജില്ലാ സാമൂഹ്യനീതി ഓഫീസുകളിൽ സമർപ്പിക്കേണ്ടതാണ്. വിശദ വിവരങ്ങൾക്ക് സാമൂഹ്യനീതി വകുപ്പ് വെബ്സൈറ്റ് www.swdkerala.gov.in സന്ദർശിക്കുക.