ചേർത്തലയുടെ സ്വപ്ന പദ്ധതിക്ക് തുടക്കമായി
ആലപ്പുഴ : ചേർത്തല നഗരവാസികളുടെ ചിരകാല സ്വപ്ന പദ്ധതിയായ മനോരമ കവലയുടെ (വടക്കേ അങ്ങാടി കവലയുടെ) നവീകരണ പ്രവർത്തനങ്ങൾക്ക് തുടക്കമായി. നവീകരണ പ്രവര്‍ത്തികളുടെ ഉദ്ഘാടനം പൊതുമരാമത്ത്-രജിസ്ട്രേഷന്‍ വകുപ്പ് മന്ത്രി ജി സുധാകരൻ നിർവഹിച്ചു.

ദീർഘനാളത്തെ പരിശ്രമത്തിനൊടുവിൽ സാക്ഷാൽക്കരിക്കാൻ സാധിച്ചതാണ് കവലയുടെ വികസനമെന്ന് മന്ത്രി ജി സുധാകരൻ പറഞ്ഞു. മന്ത്രി പി തിലോത്തമൻ പദ്ധതിക്ക് വേണ്ടി കൂടുതൽ അധ്വാനിച്ചുവെന്നും അതിന്റെ ഫലമാണ് ഇന്ന് യാഥാർഥ്യമായിരിക്കുന്നതെന്നും മന്ത്രി കൂട്ടിച്ചേർത്തു. കവലയുടെ വികസനത്തിനായി പ്രവർത്തിച്ച മന്ത്രി പി തിലോത്തമനെ മന്ത്രി അഭിനന്ദിക്കുകയും ചെയ്തു.

ജനങ്ങൾ കാത്തിരുന്ന വികസനമാണ് വടക്കേ അങ്ങാടി കവല (മനോരമ കവല) യിലേതെന്ന് ചടങ്ങിൽ അധ്യക്ഷത വഹിച്ച ഭക്ഷ്യ-പൊതു വിതരണ വകുപ്പ് മന്ത്രി പി തിലോത്തമൻ പറഞ്ഞു. ചേർത്തലയിലെ പ്രധാന കവാടമായ കവലയിലെ വികസനം പുതിയ കാലത്തിന്റെ അനിവാര്യതയാണെന്നും മന്ത്രി കൂട്ടിച്ചേർത്തു. നിരന്തരമായ പരിശ്രമങ്ങൾക്കൊടുവിലാണ് വികസനം യാഥാർഥ്യമാകുന്നതെന്നും പിന്തിരിഞ്ഞു നോക്കുമ്പോൾ തികഞ്ഞ ചാരിതാർത്ഥ്യം ഉണ്ടെന്നും മന്ത്രി പറഞ്ഞു. മനോരമ കവലയുടെ വികസനത്തോടെ ചേർത്തല നഗരത്തിന്റെ വികസനം കൂടിയാണ് യാഥാർത്ഥ്യമാകുന്നതെന്നും ചേർത്തലയുടെ സ്വപ്ന പദ്ധതി വേഗത്തിൽ പൂർത്തിയാക്കാൻ സാധിക്കുമെന്നും മന്ത്രി കൂട്ടിച്ചേർത്തു. വികസനം യാഥാർത്ഥ്യമാകുന്നതോടെ കവലയ്ക്ക് ‘ നങ്ങേലി സ്ക്വയർ ‘ എന്ന് പുനർനാമകരണം നടത്തുമെന്നും മന്ത്രി പറഞ്ഞു.

ചേർത്തലയിലെ പ്രധാനപ്പെട്ട റോഡുകൾ ആയ ഓൾഡ് എൻ. എച്ച് റോഡ്, മുട്ടം ബസാർ എട്ടുപുരക്കൽ റോഡ്, കോൺവെന്റ് റോഡ്, മുട്ടം മിൽ ലാൻഡിങ് റോഡ് എന്നീ റോഡുളെ ബന്ധിപ്പിക്കുന്ന ഒരു പ്രധാന ജംഗ്ഷനാണിത്. 17.42 സെന്റ് ഭൂമിയാണ് കവലയുടെ വികസനവുമായി ബന്ധപ്പെട്ട് സർക്കാർ ഏറ്റെടുത്തിട്ടുള്ളത്. ചേർത്തല എംഎൽഎയും ഭക്ഷ്യപൊതുവിതരണ വകുപ്പ് മന്ത്രിയുമായ പി തിലോത്തമന്റെ ആസ്തി വികസന ഫണ്ടിൽ നിന്നും രണ്ടു കോടി രൂപയും, സംസ്ഥാന ബജറ്റിൽ നിന്നുള്ള 8.5 കോടി രൂപയും വിനിയോഗിച്ചാണ് വികസന പ്രവർത്തനങ്ങൾ നടപ്പാക്കുന്നത്. കവലയിൽ ഓൾഡ് എൻഎച്ച് റോഡിൽ ഇരുവശങ്ങളിലുമായി 70 മീറ്റർ വീതം നീളത്തിലും മറ്റ് രണ്ട് റോഡുകളിൽ 55 മീറ്റർ വീതം നീളത്തിലുമായി ആകെ 250 മീറ്റർ റോഡിനും വികസന പ്രവൃത്തികളാണ് നിശ്ചയിച്ചിരിക്കുന്നത്. റോഡിന്റെ വീതി കൂട്ടുന്നതിനൊപ്പം ഇരുവശങ്ങളിലും ടൈൽ വിരിക്കും. കൂടാതെ അത്യാവശ്യ സ്ഥലങ്ങളിൽ കാനകളുടെയും ഐറിഷ് ഡ്രെയിനുകളുടെയും നിർമ്മാണം, റോഡ് സുരക്ഷാ മാർഗ്ഗങ്ങളായ സൈൻബോർഡ്, ലൈൻ മാർക്കിംഗ്, റോഡ് സ്റ്റഡുകൾ എന്നിവയും സ്ഥാപിക്കും.

ചടങ്ങിൽ ചേർത്തല മുൻസിപ്പൽ ചെയർമാൻ വി ടി ജോസഫ്, വയലാർ ഗ്രാമ പഞ്ചായത്ത് പ്രസിഡന്റ് എസ് വി ബാബു, മുൻസിപ്പൽ പ്രതിപക്ഷ നേതാവ് എൻ ആർ ബാബുരാജ്, വാർഡ് കൗൺസിലർ കെ ബി മുരളി, വാർഡ് കൗൺസിലർ ജി അജിത്ത്, എക്സിക്യൂട്ടീവ് എൻജിനീയർ ബി വിനു, അസിസ്റ്റന്റ് എക്സിക്യൂട്ടീവ് എഞ്ചിനീയർ എൽ രാജശ്രീ തുടങ്ങിയവർ പങ്കെടുത്തു.