ഇടുക്കി: പകര്‍ച്ച വ്യാധികളും, ജലജന്യ രോഗങ്ങളും തടയുന്നതിനായി ജില്ലയില്‍ നടന്നുവരുന്ന മഴക്കാലപൂര്‍വ്വ ശുചീകരണ പ്രവര്‍ത്തനങ്ങള്‍ കാര്യക്ഷമമായി നടപ്പിലാക്കുന്നത് സംബന്ധിച്ചുള്ള കോര്‍ കമ്മറ്റി യോഗം ഇടുക്കി കലക്ടറുടെ ചേമ്പറില്‍ ജില്ലാ കളക്ടര്‍ എച്ച്. ദിനേശന്റെ അദ്ധ്യക്ഷതയില്‍ ചേര്‍ന്നു. മഴക്കാല പൂര്‍വ്വ ശുചീകരണം, പകര്‍ച്ച വ്യാധി പ്രതിരോധം എന്നിവ ജില്ലയില്‍ കാര്യക്ഷമമായി നടപ്പിലാക്കുന്നതിനായി തദ്ദേശസ്വയം ഭരണ സ്ഥാപനങ്ങളുടെ സഹകരണത്തോടെ പ്രവര്‍ത്തനങ്ങള്‍ നടത്തുന്നതിന് തീരുമാനിച്ചു.
വീട്, സ്ഥാപനങ്ങള്‍, പൊതുസ്ഥലങ്ങള്‍ എന്നിവ മാലിന്യ മുക്തമാക്കുക, ആരോഗ്യ സുരക്ഷക്കും പരിസ്ഥിതിക്കും ദോഷകരമാകുന്ന തരത്തില്‍ മാലിന്യം കത്തിക്കുന്നതിനും വലിച്ചെറിയുന്നതിനും എതിരെ നിയമ നടപടി സ്വീകരിക്കുക, പൊതു പരിപാടികളിലും യോഗങ്ങളിലും ഗ്രീന്‍ പ്രോട്ടോക്കോള്‍ പാലിക്കുക, ഹരിത കര്‍മ്മസേനയെ ഉപയോഗിച്ച് വീട് വീടാന്തിരം വാതില്‍പ്പടി ശേഖരണം നടത്തുക, മുന്നോരുക്ക പ്രവര്‍ത്തനങ്ങളുടെ ഭാഗമായി ബന്ധപ്പെട്ട മെമ്പര്‍/കൗണ്‍സിലര്‍ ചെയര്‍മാനും ആരോഗ്യ വകുപ്പ് ഫീല്‍ഡ് സ്റ്റാഫ് കണ്‍വീനറുമായിട്ടുള്ള വാര്‍ഡ് തല ആരോഗ്യ ശുചിത്വ പോഷക സമിതി യോഗം ചേരുക, ഓരോ വാര്‍ഡിലും 50 വീടുകള്‍ ഉള്‍പ്പെടുത്തി ക്ലസ്റ്ററുകള്‍ രൂപീകരിക്കുക. പ്രസ്തുത ക്ലസ്റ്ററുകളില്‍ ശുചിത്വ സ്‌ക്വാഡുകള്‍ രൂപീകരിക്കുക.
ശുചിത്വ മാപ്പിംഗ് നടത്തുക, കൊതുക് വളരാന്‍ സാധ്യതയുള്ള സ്ഥലങ്ങള്‍, ഓടകള്‍, കാനകള്‍ എന്നിവ വൃത്തിയാക്കുക, ആഴ്ചയില്‍ ഒരു ദിവസം ഡ്രൈഡേ ആചരിക്കുക, മാലിന്യങ്ങള്‍ ശാസ്ത്രീയമായി സംസ്‌ക്കരിക്കുന്നതിനുള്ള സംവിധാനങ്ങള്‍ ഒരുക്കുക, പ്ലാസ്റ്റിക് ക്യാരി ബാഗുകളുടെ നിരോധനം കര്‍ശ്ശനമായി നടപ്പിലാക്കുന്നതിന്റെ ഭാഗമായി ജില്ലാതല മോണിറ്ററിംഗ് കമ്മറ്റിയുടെ നേതൃത്വത്തില്‍ അടിമാലി, തൊടുപുഴ, മൂന്നാര്‍, കട്ടപ്പന, നെടുംങ്കണ്ടം, ടൗണുകളില്‍ നടത്തിയ പരിശോധനയില്‍ 165 കിലോഗ്രാം നിരോധിത പ്ലാസ്റ്റിക് ഉത്പന്നങ്ങള്‍ പിടിച്ചെടുത്തതായി അറിയിച്ചു.
തിരഞ്ഞെടുപ്പിന് ശേഷം ജില്ലയില്‍ ആകമാനം ഒരു ദിവസം ശുചീകരണ പ്രവര്‍ത്തനങ്ങള്‍ നടത്തുന്നതിന് തീരുമാനിച്ചു, വഴിയോര ഭക്ഷണശാലയില്‍ വില്‍ക്കുന്ന ശീതള പാനീയങ്ങളുടെയും ആഹാര സാധനങ്ങളുടെയും ഗുണനിലവാര പരിശോധന നടത്തുന്നതിന് ഭക്ഷ്യ സുരക്ഷ വകുപ്പിനെ ചുമലതപ്പെടുത്തി, ഫ്‌ളക്‌സ് നിരോധനം കര്‍ശ്ശനമാക്കാന്‍ തദ്ദേശ സ്വയം ഭരണ സ്ഥാപനങ്ങള്‍ക്ക് കളക്ടര്‍ നിര്‍ദ്ദേശം നല്‍കി, വാര്‍ഡ്തല സാനിറ്റേഷന്‍ സമിതിക്ക് അനുവദിക്കുന്ന 25,000 രൂപ ഫലപ്രദമായി വിനിയോഗിക്കുന്നതിന് ഗ്രാമപഞ്ചായത്തുകള്‍ക്ക് നിര്‍ദ്ദേശം നല്‍കി.
യോഗത്തില്‍ പഞ്ചായത്ത് ഡെപ്യൂട്ടി ഡയറക്ടര്‍ കെ. വി കുര്യാക്കോസ്, എന്‍.എച്ച് എം പിആര്‍ഒ ബിബിന്‍ ബേബി, മെഡിക്കല്‍ ഓഫീസ് അസി. ഗ്രേഡ്1 കെ. വൈ ജോണ്‍സണ്‍, ഡെപ്യൂട്ടി ഡിഎംഒ (ആരോഗ്യം) ഡോ. സുഷമ പി. കെ, ഡിഎംഒ (ഐഎസ്എം), ഡോ. ശുഭ കെ.പി, ഡിവൈഎസ്പി നിഷാദ്‌മോന്‍, ജില്ലാ ഇന്‍ഫര്‍മേഷന്‍ ഓഫീസര്‍ എന്‍. സതീഷ് കുമാര്‍, റെജി കുമാര്‍ റ്റി.എസ് തുടങ്ങിയവര്‍ പങ്കെടുത്തു.