എൻഎസ്എസ് സാമൂഹ്യബോധമുള്ള കുട്ടികളുടെ കൂട്ടായ്മ; മന്ത്രി ആർ ബിന്ദു

എൻഎസ്എസ് സാമൂഹ്യ സേവന താൽപ്പര്യങ്ങളുള്ള സാമൂഹ്യബോധമുള്ള കുട്ടികളുടെ കൂട്ടായ്മയാണെന്ന് ഉന്നതവിദ്യാഭ്യാസ സാമൂഹ്യനീതി വകുപ്പ് മന്ത്രി ഡോ. ആർ ബിന്ദു. എറിയാട് പഞ്ചായത്തിൽ 21-ാം വാർഡിൽ എം ഇ എസ് ഹയർസെക്കന്ററി സ്കൂൾ എൻഎസ്എസ് യൂണിറ്റ് നിർമിച്ച് നൽകിയ സ്നേഹഭവനത്തിൻ്റെ താക്കോൽ കൈമാറ്റം നിർവ്വഹിച്ച് സംസാരിക്കുകയായിരുന്നു മന്ത്രി.

എൻഎസ്എസിൽ അണിനിരക്കുന്ന കുട്ടികൾ മനുഷ്യ സ്നേഹ പ്രേരിതമായിട്ടുള്ളതും ജീവകാരുണ്യപരമായിട്ടുള്ളതുമായ ഒട്ടനവധി പരിപാടിയുടെ ഭാഗമാകുന്നുണ്ടെന്നും മന്ത്രി പറഞ്ഞു. കലാലയങ്ങളിലും വിദ്യാഭ്യാസ സ്ഥാപനങ്ങളിലും നടപ്പാക്കുന്ന വിമുക്തി പോലുള്ള പദ്ധതികളിലും എൻഎസ്എസ് കൂട്ടായ്മയ്മകൾക്ക് ഭാഗമാകാൻ പ്രത്യേക പദ്ധതികൾ ഒരുക്കേണ്ടതുണ്ടെന്നും മന്ത്രി കൂട്ടിച്ചേർത്തു.

ഹയർ സെക്കന്ററിനാഷണൽ സർവീസ് സ്കീം തൃശൂർ ജില്ലയും ഗുണഭോക്താവായി കണ്ടെത്തിയ വിദ്യാർത്ഥി ഉൾപ്പെടുന്ന യൂണിറ്റും സംയുക്തമായി നടപ്പിലാക്കുന്ന പദ്ധതിയാണ് ” തണൽ – സ്നേഹ ഭവനം”. തൃശൂർ ജില്ലയിൽ ഈ വർഷം മൂന്ന് സഹപാഠികൾക്കാണ് എൻഎസ്എസ് വളണ്ടിയർമാർ വീട് നിർമ്മിച്ച് നൽകുന്നത്. എം ഇ എസ് ഹയർസെക്കന്ററി സ്കൂൾ ശ്രീനാരായണപുരം (പി.വെമ്പല്ലൂർ ) യൂണിറ്റിന്റെ നേതൃത്വത്തിൽ എറിയാട് പഞ്ചായത്തിൽ നിർമിക്കുന്ന ഭവനം കൂടാതെ മറ്റ് രണ്ടെണ്ണം വെള്ളാങ്കല്ലൂർ പഞ്ചായത്തിലും, മാളയിലും നിർമിക്കുന്നുണ്ട്. അതിന്റെ നിർമ്മാണവും പുരോഗമിച്ച് കൊണ്ടിരിക്കുകയാണ്.

560 സ്ക്വയർ ഫീറ്റിൽ നിർമിച്ച വീട്ടിൽ 2 കിടപ്പ്മുറികൾ, 1 ഹാൾ, 1 അടുക്കള, സിറ്റ്ഔട്ട് എന്നിവയാണ് ഉള്ളത്. എട്ട് ലക്ഷം രൂപയാണ് നിർമ്മാണ ചെലവ്. ജില്ലയിലെ പതിനായിരത്തിലധികം വരുന്ന ഹയർസെക്കന്ററി എൻഎസ്എസ് വളണ്ടിയർമാർ നിരവധി ചലഞ്ചുകളിലൂടെയാണ് മൂന്നു വീടുകൾക്കായുള്ള വിഭവസമാഹരണം നടത്തിയത്.
പ്രധാനമായും സ്ക്രാപ്പ് ചലഞ്ചിലൂടെയും – (സ്വന്തം വീട്ടിലെയും തൊട്ടടുത്തുള്ള വീടുകളിൽ നിന്നും പാഴ്‌വസ്തുക്കൾ ശേഖരിച്ചു കൊണ്ട് ), നിരവധി ഫുഡ് ചലഞ്ചുകൾ സംഘടിപ്പിച്ചും ,
കൂടാതെ ഗുണഭോക്താവ് അടങ്ങുന്ന യൂണിറ്റിലെ വളണ്ടിയർമാർ നിരവധി പ്രവർത്തനങ്ങളിലൂടെ കണ്ടെത്തിയ തുകയാണ് ഭവന നിർമ്മാണത്തിനായി ഉപയോഗിക്കുന്നത്.

ഇ ടി ടൈസൺ മാസ്റ്റർ എം എൽ എ അധ്യക്ഷത വഹിച്ച ചടങ്ങിൽ മതിലകം ബ്ലോക്ക് പഞ്ചായത്ത് പ്രസിഡൻ്റ് സി കെ ഗിരിജ, എറിയാട് ഗ്രാമപഞ്ചായത്ത് പ്രസിഡൻ്റ് കെ പി രാജൻ, എസ് എൻ പുരം ഗ്രാമപഞ്ചായത്ത് പ്രസിഡൻ്റ് എം എസ് മോഹനൻ,
ഡി ഡി ഇ തൃശൂർ ടിവി മദനമോഹനൻ, സ്കൂൾ പിടിഎ പ്രസിഡൻ്റ് കെ എ നാസർ തുടങ്ങിയവർ മുഖ്യാതിഥികളായി സംസാരിച്ചു. തൃശൂർ ജില്ലാ എൻഎസ്എസ് കോ- ഓഡിനേറ്റർ എം വി പ്രദീഷ് പദ്ധതി വിശദീകരിച്ചു.

ജില്ലാ പഞ്ചായത്ത് മെമ്പർമാരായ സുഗത ശശിധരൻ, കെ എസ് ജയ, ബ്ലോക്ക് പഞ്ചായത്ത് മെമ്പർമാരായ ശോഭന, നൗഷാദ് കറുകപ്പാടത്ത്, എറിയാട് ഗ്രാമപഞ്ചായത്ത് വിദ്യാഭ്യാസ സ്റ്റാൻ്റിംഗ് കമ്മിറ്റി ചെയർമാൻ അജ്മൽ ഷക്കീർ, എറിയാട് ഗ്രാമപഞ്ചായത്ത് വാർഡ് മെമ്പർമാരായ അംബികാ ശിവപ്രിയൻ, ആർ കൃഷ്ണേന്ദു, ഹയർസെക്കന്ററി അക്കാദമിക് കോ- ഓഡിനേറ്റർ വി എം കരീം, എംഇഎസ് തൃശൂർ ജില്ലാ പ്രസിഡൻ്റ് വി എം ഷൈൻ, എംഇഎസ് തൃശൂർ ജില്ലാ സെക്രട്ടറി മുഹമ്മദ് ഷമീർ, കൊടുങ്ങല്ലൂർ എഇഒ ദിനകരൻ തുടങ്ങിയവർ ചടങ്ങിൽ വിശിഷ്ട സാന്നിധ്യം വഹിച്ചു. എംഇഎസ് എച്ച്എസ്എസ് പ്രിൻസിപ്പൽ എ ഹബീബ് സ്വാഗതവും പ്രോഗ്രാം ഓഫീസർ കെ എ ലിഷ നന്ദിയും പറഞ്ഞു.