മന്ത്രി ഡോ. ആർ. ബിന്ദു ഉദ്ഘാടനം നിർവഹിക്കും

കെ.ആർ. നാരായണൻ നാഷണൽ ഇൻസ്റ്റിറ്റ്യൂട്ട് ഓഫ് വിഷ്വൽ സയൻസ് ആൻഡ് ആർട്സിൽ പുതുതായി നിർമിച്ച ഓഡിയോ മിക്സ് സ്റ്റുഡിയോയുടെയും ഡിഐ സ്യൂട്ടിന്റെയും ഉദ്ഘാടനം ഒക്ടോബർ 20ന് നടക്കും. വൈകിട്ട് നാലിന് തെക്കുംതലയിലെ കാമ്പസിൽ നടക്കുന്ന ചടങ്ങിൽ ഉന്നതവിദ്യാഭ്യാസ വകുപ്പു മന്ത്രി ഡോ. ആർ. ബിന്ദു ഉദ്ഘാടനം നിർവഹിക്കും.
സഹകരണ-സാംസ്‌കാരിക വകുപ്പു മന്ത്രി വി.എൻ. വാസവൻ അധ്യക്ഷത വഹിക്കും. ഉമ്മൻ ചാണ്ടി എം.എൽ.എ. വിശിഷ്ടാതിഥിയാകും. തോമസ് ചാഴികാടൻ എം.പി., ചെയർമാൻ അടൂർ ഗോപാലകൃഷ്ണൻ, ഉന്നതവിദ്യാഭ്യാസ വകുപ്പ് പ്രിൻസിപ്പൽ സെക്രട്ടറി ഇഷിതാ റോയ്, അകലക്കുന്നം ഗ്രാമപഞ്ചായത്ത് പ്രസിഡന്റ് ജാൻസി ബാബു, ഗ്രാമപഞ്ചായത്തംഗം രാജശേഖരൻ നായർ, ഡയറക്ടർ ശങ്കർ മോഹൻ, സ്റ്റുഡന്റ്സ് കൗൺസിൽ വൈസ് ചെയർമാൻ കെ.എൻ. ഹരിപ്രസാദ്, അധ്യാപക പ്രതിനിധി ഫൗസിയ ഫാത്തിമ, സ്റ്റാഫ് പ്രതിനിധി എം.എൻ. രാജേഷ് എന്നിവർ പങ്കെടുക്കും.
ആധുനിക ശബ്ദ-ദൃശ്യ സംവിധാനങ്ങളോടു കൂടിയ 180 പേർക്കിരിക്കാവുന്ന ഓഡിയോ മിക്സ് സ്റ്റുഡിയോയാണ്(പ്രിവ്യൂ സ്റ്റുഡിയോ) നിർമിച്ചിട്ടുള്ളത്. ചലച്ചിത്രങ്ങളുടെ കളർഗ്രേഡിംഗിനുള്ള അത്യാധുനിക ഡിഐ സ്യൂട്ടാണ് നിർമിച്ചിട്ടുള്ളത്.