സംസ്ഥാന സര്‍ക്കാരിന്റെ ലഹരി വിമുക്ത കേരളം നോ ടു ഡ്രഗ്സ് ക്യാമ്പയിന്റെ ഭാഗമായി അതിഥി തൊഴിലാളികള്‍ക്കിടയില്‍ തൊഴില്‍ നൈപുണ്യ വകുപ്പ് നടപ്പിലാക്കുന്ന കവച് ലഹരി മുക്ത പരിപാടിയുടെ ഭാഗമായി എക്‌സൈസ് വകുപ്പിന്റെ സഹകരണത്തോടെ മൂന്നാര്‍ കല്ലാറിലെ കല്ലാര്‍വാലി എസ്റ്റേറ്റില്‍ ബോധവല്‍ക്കരണ പരിപാടി സംഘടിപ്പിച്ചു. പള്ളിവാസല്‍ ഗ്രാമപഞ്ചായത്തംഗം പുഷ്പ സജി ബോധവല്‍ക്കരണ പരിപാടിയുടെ ഉദ്ഘാടനം നിര്‍വ്വഹിച്ചു. ക്യാമ്പില്‍ പങ്കെടുത്തവര്‍ ലഹരി വിരുദ്ധ പ്രതിജ്ഞ എടുത്തു. മൂന്നാര്‍ അസിസ്റ്റന്റ് ലേബര്‍ ഓഫീസര്‍ സുജ എം. കെ. അതിഥി തൊഴിലാളികള്‍ക്ക് ലഹരി വിരുദ്ധ പ്രതിജ്ഞ ചൊല്ലിക്കൊടുത്തു.
ലഹരി വസ്തുക്കള്‍ കൈവശം സൂക്ഷിച്ചാല്‍ നേരിടേണ്ടി വരുന്ന നിയമ പ്രശ്‌നങ്ങള്‍, ശിക്ഷകള്‍, ലഹരിയുടെ ഉപയോഗത്തിലൂടെ ഉണ്ടാകുന്ന കുടുംബ ബന്ധങ്ങളുടെ തകര്‍ച്ച, ആരോഗ്യ നഷ്ടം തുടങ്ങിയ വിവിധ കാര്യങ്ങള്‍ അതിഥി തൊഴിലാളികളെ ക്യാമ്പിലൂടെ ബോധ്യപ്പെടുത്തി. മൂന്നാര്‍ ഡെപ്യൂട്ടി ലേബര്‍ ഓഫീസര്‍ ഷാജഹാന്‍ എം. എം. ചടങ്ങില്‍ അധ്യക്ഷത വഹിച്ചു. മൂന്നാര്‍ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ രാജീവ് ജി മുഖ്യപ്രഭാഷണം നടത്തി. മൂന്നാര്‍ എക്‌സൈസ് സര്‍ക്കിള്‍ പ്രിവന്റീവ് ഓഫീസര്‍ ജയന്‍ പി. ജോണ്‍ ലഹരി വിരുദ്ധ ബോധവല്‍ക്കരണ ക്ലാസ് നയിച്ചു. എക്‌സൈസ് ഉദ്യോഗസ്ഥരായ സുരേഷ് കെ. എം, അനില്‍ കുമാര്‍ കെ. പി, തൊഴില്‍വകുപ്പ് ഉദ്യോഗസ്ഥരായ ദീപേഷ് ധര്‍മ്മജന്‍, സിനി ജോസ്, ജിജോ ആന്റണി ജോസ് തുടങ്ങിയവര്‍ പരിപാടിയില്‍ പങ്കെടുത്തു.