തിരൂരങ്ങാടി താലൂക്ക്, പെരുവള്ളൂർ വില്ലേജിലെ പട്ടയമേളയുടെ ഉദ്ഘാടനം മന്ത്രി നിർവഹിച്ചു

പെരുവള്ളൂരിലെ പുതിയ വില്ലേജ് ഓഫീസ് നിർമാണത്തിന് 50 ലക്ഷം രൂപ റവന്യൂ വകുപ്പ് നൽകുമെന്നും കെട്ടിടത്തിന്റെ നിർമാണം ജനുവരിയിൽ തന്നെ തുടങ്ങി നാലോ അഞ്ചോ മാസം കൊണ്ട് പൂർത്തീകരിക്കാൻ ശ്രമം നടത്തുമെന്നും റവന്യൂ – ഭവന നിർമാണ വകുപ്പ് മന്ത്രി കെ.രാജൻ അറിയിച്ചു. തിരൂരങ്ങാടി താലൂക്ക്, പെരുവള്ളൂർ വില്ലേജിലെ പട്ടയമേളയുടെ ഉദ്ഘാടനം പറമ്പിൽ പീടിക ജി.എൽ.പി സ്‌കൂളിൽ നിർവഹിച്ചു സംസാരിക്കുകയായിരുന്നു അദ്ദേഹം.
ഭൂമിയില്ലാത്ത എല്ലാ മനുഷ്യർക്കും ഏതെങ്കിലും വിധത്തിൽ ഭൂമി ലഭ്യമാക്കുകയാണ് സർക്കാർ ലക്ഷ്യം. ജനുവരി 2023 മുതൽ നാല് മേഖലകളിലായി നാലു ഡെപ്യൂട്ടി കലക്ടർമാരെ നിയമിച്ച് ഭൂമി പ്രശ്നങ്ങൾ കൃത്യതയോടെ കൈകാര്യം ചെയ്യും. ഇതുവഴി അന്യാധീനപ്പെട്ട 2000ത്തോളം ഹെക്ടർ ഭൂമിയെങ്കിലും തിരിച്ചുപിടിക്കാനും കേരളത്തിലെ ഭൂരഹിതരായവർക്ക് വീതിച്ചു വിതരണം ചെയ്യാനും സാധിക്കുമെന്നും അദ്ദേഹം പറഞ്ഞു. പി.അബ്ദുൽ ഹമീദ് മാസ്റ്റർ എം.എൽ.എ അധ്യക്ഷത വഹിച്ചു.
മേളയിൽ 72 കുടുംബങ്ങൾക്ക് പട്ടയം നൽകി. വട്ടപ്പറമ്പ് കോളനി (8), തടത്തിൽ കോളനി (8), ചുള്ളിയാലപുറായ കോളനി (9), ഉള്ളാട്ടുമാട് കോളനി (47) എന്നീ കോളനികളിലെ നിവാസികൾക്കാണ് പട്ടയം ലഭിച്ചിരിക്കുന്നത്. ഭൂരഹിത ഗ്രാമീണ തൊഴിലാളികൾക്കുള്ള ഭവന പദ്ധതി ലക്ഷം വീട് കോളനി എന്നീ പദ്ധതികൾക്കായി ഏറ്റെടുത്തിട്ടുള്ള ഭൂമിയിലെ കൈവശക്കാർക്ക് 2019, 2020, 2021,2022 എന്നീ വർഷങ്ങളിൽ പെരുവള്ളൂർ ഗ്രാമപഞ്ചായത്ത് അനുവാദ പത്രികകൾ നൽകിയിരുന്നു. ഇതിൽപ്പെട്ട 82 കുടുംബങ്ങൾക്കാണ് പട്ടയം നൽകാൻ തീരുമാനിച്ചത്. 82 കുടുംബങ്ങളിൽ 10 പേർക്ക് പൊന്നാനിയിൽ നടന്ന പട്ടയമേളയിൽ റവന്യൂ മന്ത്രി നേരത്തെ വിതരണം ചെയ്തിരുന്നു. ബാക്കിയുള്ള 72 കുടുംബങ്ങൾക്കാണ് പറമ്പിൽ പീടിക ജി. എൽ. പി സ്‌കൂളിൽ പട്ടയം കൈമാറിയത്. പട്ടയം ലഭിച്ച കുടുംബങ്ങളിൽ അഞ്ച് പേർ 25 വർഷത്തിലധികായി ഇവിടെ താമസിച്ചുവരികയാണ്. ഇരുപത് വർഷത്തോളമായി താമസിച്ചു വരുന്ന 40 കുടുംബങ്ങളും പത്ത് വർഷത്തിൽ കുറവ് കാലയളവിൽ ഇവിടെ താമസിക്കുന്ന 14 കുടുംബങ്ങളുമുണ്ട്. ഈ കോളനികളിൽപ്പെട്ട ഏഴ് കുടുംബങ്ങൾക്ക് കൂടി പട്ടയം നൽകുന്നതിനുള്ള നടപടികൾ വിവിധ ഘട്ടങ്ങളിലായി തിരൂരങ്ങാടി താലൂക്ക് ഓഫീസിൽ സ്വീകരിച്ച് വരുന്നുണ്ട്. ‘എല്ലാവർക്കും ഭൂമി, എല്ലാ ഭൂമിക്കും രേഖ, എല്ലാ സേവനങ്ങളും സ്മാർട്ട്’ എന്ന കേരള സർക്കാറിന്റെ പ്രഖ്യാപിത ലക്ഷ്യത്തിന്റെ ഭാഗമായാണ് ജില്ലയിലെ തിരൂരങ്ങാടി താലൂക്ക്, പെരുവള്ളൂർ വില്ലേജ് പട്ടയമേള സംഘടിപ്പിച്ചത്. ചടങ്ങിൽ ജില്ലാകലക്ടർ വി.ആർ പ്രേംകുമാർ, എ.ഡി.എം എൻ.എം മെഹറലി, തിരൂരങ്ങാടി ബ്ലോക്ക് പഞ്ചായത്ത് പ്രസിഡന്റ് കെ.ടി സാജിത, പെരുവള്ളൂർ ഗ്രാമപഞ്ചായത്ത് പ്രസിഡന്റ് കെ.അബ്ദുൽ കലാം, ജില്ലാ പഞ്ചായത്ത് സ്ഥിരം സമിതി അധ്യക്ഷമാരായ ആലിപ്പറ്റ ജമീല, സറീന ഹസീബ്, തിരൂരങ്ങാടി ബ്ലോക്ക് പഞ്ചായത്ത് ആരോഗ്യ – വിദ്യാഭ്യാസ സ്ഥിരം സമിതി അധ്യക്ഷ പി.കെ റംല, ആയിശ ഫൈസൽ, വിവിധ രാഷ്ട്രീയ പാർട്ടി പ്രതിനിധികൾ എന്നിവർ പങ്കെടുത്തു.