ആലപ്പുഴ: കേരള ലളിതകല അക്കാദമി കലാവിദ്യാർത്ഥികൾക്ക് നൽകുന്ന 2018-2019ലെ സ്‌ക്കോളർഷിപ്പിന് അപേക്ഷ ക്ഷണിച്ചു. എല്ലാ സർക്കാർ സ്ഥാപനങ്ങളിലും സർക്കാർ അംഗീകൃത സ്ഥാപനങ്ങളിലും യൂണിവേഴ്സിറ്റികളിലും ചിത്രകല/ശില്പകല/ഗ്രാഫിക്സ് വിഷയങ്ങളിൽ എം.എഫ്.എ./എം.വി.എ., ബി.എഫ്.എ./ബി.വി.എ. കോഴ്സുകൾക്ക് പഠിക്കുന്ന കേരളീയരായ വിദ്യാർത്ഥികൾക്കാണ് സ്‌ക്കോളർഷിപ്പ്. എം.എഫ്.എ./എം.വി.എ.യ്ക്ക് 12,000രൂപ വീതം ആറു പേർക്കും ബി.എഫ്.എ./ബി.വി.എ.യ്ക്ക് 10,000രൂപ വീതം അഞ്ചുപേർക്കുമാണ് സ്‌കോളർഷിപ്പ് നൽകുക. സ്ഥാപനത്തിന്റെ മേധാവിയിൽ നിന്നുള്ള സർട്ടിഫിക്കറ്റുകൾ അപേക്ഷയോടൊപ്പം സമർപ്പിക്കണം. തങ്ങൾക്ക് മറ്റൊരു സ്‌ക്കോളർഷിപ്പും ലഭിക്കുന്നില്ലെന്ന് അപേക്ഷകർ സാക്ഷ്യപ്പെടുത്തിയിരിക്കണം. ഓരോ അപേക്ഷകരും അവരുടെ കലാസൃഷ്ടികളുടെ അനുയോജ്യമായ വലുപ്പത്തിലുള്ള പത്ത് കളർ ഫോട്ടോഗ്രാഫുകൾ അപേക്ഷയോടൊപ്പം നൽകണം. ഈ കലാസൃഷ്ടികൾ യഥാർത്ഥത്തിൽ അവരവർ ചെയ്തതാണെന്ന് ചിത്രങ്ങളുടെ പുറകുവശത്ത് സ്ഥാപന മേധാവിയോ സാക്ഷ്യപ്പെടുത്തണം. കൂടാതെ അപേക്ഷകരുടെ കലാപ്രവർത്തനത്തെ ക്കുറിച്ച് ബന്ധപ്പെട്ട വകുപ്പ് അദ്ധ്യാപകന്റെ പ്രത്യേക അഭിപ്രായവും ഉൾക്കൊള്ളിച്ചിരിക്കണം.
സ്‌ക്കോളർഷിപ്പ് നിബന്ധനകളും അപേക്ഷ ഫോറവും എല്ലാ കലാവിദ്യാലയങ്ങളിലും, അക്കാദമിയുടെ എല്ലാ ഗ്യാലറികളിലും അക്കാദമിയുടെ വെബ് സൈറ്റിലും (www.lalithkala.org) ലഭിക്കും. അപേക്ഷഫോറവും കൂടുതൽ വിവരങ്ങളും തപാലിൽ ആവശ്യമുള്ളവർ അഞ്ചു രൂപയുടെ പോസ്റ്റേജ് സ്റ്റാമ്പ് പതിച്ച സ്വന്തം മേൽവിലാസം എഴുതിയ കവർ സഹിതം സെക്രട്ടറി, കേരള ലളിതകല അക്കാദമി, തൃശൂർ-20 എന്ന വിലാസത്തിൽ എഴുതുക. പൂരിപ്പിച്ച അപേക്ഷ അക്കാദമിയിൽ ഒക്ടോബർ 10 നകം ലഭിക്കണം.
