സിവിൽ സ്റ്റേഷൻ എംസിഎഫ് മന്ത്രി കെ.രാജൻ ഉദ്ഘാടനം ചെയ്തു

റീബിൽഡ് കേരള പദ്ധതിയിൽ ഉൾപ്പെടുത്തി ക്ലീൻ കേരള കമ്പനി വഴി നിർമ്മിച്ച മെറ്റിരിയൽ കളക്ഷൻ ഫെസിലിറ്റി സെന്ററിന്റെ ഉദ്ഘാടനം റവന്യൂ ഭവന നിർമ്മാണ വകുപ്പ് മന്ത്രി കെ രാജൻ നിർവഹിച്ചു.

കലക്ട്രേറ്റ്, ക്വാർട്ടേഴ്സ് എന്നിവിടങ്ങളിൽ നിന്നുള്ള അജൈവ പാഴ്‌വസ്തുക്കൾ ശേഖരിച്ച് തരം തിരിച്ച് മാറ്റാനായി മെറ്റിരിയൽ ഫെസിലിറ്റേഷൻ സെന്റർ വഴി കഴിയും. പത്ത് ലക്ഷം രൂപ ചെലവിൽ 600 സ്ക്വയർ ഫീറ്റ് വിസ്തീർണ്ണത്തിലാണ് എംസിഎഫ് നിർമ്മിച്ചിരിക്കുന്നത്. സിവിൽ സ്റ്റേഷനിലെ എല്ലാ ഓഫീസുകളിലെയും, സിവിൽ സ്റ്റേഷനുമായി ബന്ധപ്പെട്ട ക്വാർട്ടേഴ്സുകളിലെയും പ്ലാസ്റ്റിക്, മെറ്റൽ, ഇ വെയ്സ്റ്റ്, ഗ്യാസ് വെയ്സ്റ്റ് എന്നീ അജൈവ വസ്തുക്കൾ ശേഖരിച്ച് റിസൈക്ലിങ് കമ്പനികൾ, സിമന്റ് ഫാക്ടറികൾ തുടങ്ങിയ കേന്ദ്രങ്ങളിലേക്ക് തരം തിരിച്ച് കൈമാറുന്നതിനുള്ള സംവിധാനം പുതിയ മെറ്റിരിയൽ കളക്ഷൻ സെന്റർ വഴി ഒരുക്കിയതായി ക്ലീൻ കേരള കമ്പനി ജില്ലാ മാനേജർ ശംഭു ഭാസ്കർ അറിയിച്ചു.

ടി ജെ സനീഷ് കുമാർ എംഎൽഎ, ജില്ലാ പഞ്ചായത്ത് പ്രസിഡൻറ് പി കെ ഡേവിസ് മാസ്റ്റർ, ജില്ലാ കളക്ടർ വി ആർ കൃഷ്ണതേജ, പാണഞ്ചേരി പഞ്ചായത്ത് പ്രസിഡൻറ് പി പി രവീന്ദ്രൻ, ക്ലീൻ കേരള ജില്ലാ മാനേജർ ശംഭു ഭാസ്കർ, നവകേരളം കർമ്മ പദ്ധതി കോർഡിനേറ്റർ സി ദിദിക, നിർമിതി കേന്ദ്ര റീജണൽ എ എം സതീദേവി തുടങ്ങിയവർ ചടങ്ങിൽ സന്നിഹിതരായി.