ഗതാഗതനിയമങ്ങൾ തെറ്റിച്ചാൽ പിഴ ഈടാക്കാനുള്ള ടാർഗറ്റ് നൽകുന്നത് സർക്കാരിന് പണം ലഭിക്കാനല്ലെന്നും ജനങ്ങളുടെ സുരക്ഷയെ മുൻ നിർത്തിയാണെന്നും ട്രാൻസ്പോർട്ട് കമ്മീഷണർ എസ് ശ്രീജിത്ത് പറഞ്ഞു. മോട്ടോർ വാഹന വകുപ്പ്, റോഡ് സേഫ്റ്റി ക്ലബ്ബ്, ഫസ്റ്റ് എയ്ഡ് എന്നിവയുടെ സഹകരണത്തോടെ എറണാകുളം സെൻറ് തെരേസാസ് കോളേജിൽ നടത്തിയ റോഡ് സുരക്ഷാ ബോധവൽക്കരണ സെമിനാർ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
റോഡ് സുരക്ഷയ്ക്കായി ചെയ്യുന്ന പല കാര്യങ്ങളും സർക്കാരിന് പിഴ ലഭിക്കാനാണ് എന്ന് തെറ്റിദ്ധരിക്കുന്നുണ്ട്. എഐ ക്യാമറ സ്ഥാപിച്ചതിന് ശേഷം ഹെൽമറ്റ് വയ്ക്കാതെ യാത്ര ചെയ്യുന്നവരുടെ എണ്ണം കുറഞ്ഞിട്ടുണ്ട്. അത് വഴി അപകട മരണങ്ങൾ കുറക്കാൻ കഴിയും. മരണത്തേക്കാൾ ഭീകരമായ അവസ്ഥ നട്ടെല്ലിനും മറ്റും ക്ഷതമേറ്റ് കിടപ്പിലാക്കുന്നതാണ്. അവരെ പരിചരിക്കുന്നതിനേക്കാൾ ബുദ്ധിമുട്ട് അവർക്ക് മാനസിക പിന്തുണ നൽകാനായിരിക്കും.
ഇത്തരം സാഹചര്യങ്ങൾ ഒഴിവാക്കി റോഡ് അപകടങ്ങൾ പരമാവധി കുറക്കാനാണ് ശ്രമിക്കുന്നത്. യുവാക്കളെ അടക്കം റോഡ് സുരക്ഷയെ കുറിച്ച് ബോധവാന്മാരാക്കാൻ പലതരത്തിലുള്ള പരിപാടികൾ നടത്തി വരികയാണ്. യുവാക്കളുടെ ശ്രദ്ധ ആകർഷിക്കാനാണ് സിനിമാ താരങ്ങളെയും പരിപാടിയുടെ ഭാഗമാക്കുന്നതെന്ന് അദ്ദേഹം പറഞ്ഞു.
മൊബൈൽ സ്ക്രീൻ ഗാർഡിന്റെ പ്രാധാന്യം പോലും ഹെൽമറ്റിന് പലരും കൊടുക്കുന്നില്ല: നടൻ ഷെയ്ൻ നിഗം
മൊബൈൽ ഫോണിന് സ്ക്രീൻ ഗാർഡിന്റെ സംരക്ഷണം നൽകുന്ന നമ്മളിൽ പലരും ഹെൽമറ്റ് വയ്ക്കാനുള്ള മനസ് കാണിക്കുന്നില്ലെന്ന് നടൻ ഷെയ്ൻ നിഗം പറഞ്ഞു. ചടങ്ങിൽ വിശിഷ്ടാതിഥിയായി പങ്കെടുത്ത് സംസാരിക്കുകയായിരുന്നു ഷെയ്ൻ നിഗം. സെൽഫ് ലവ്, സെൽഫ് കെയർ എന്നീ കാര്യങ്ങൾക്കും പ്രാധാന്യം കൊടുക്കാൻ നമുക്ക് കഴിയണം. ഗതാഗത നിയമങ്ങൾ പാലിക്കുന്നത് നമ്മുടെ തന്നെ സുരക്ഷയുടെ ഭാഗമാണെന്നും അദ്ദേഹം പറഞ്ഞു. നടിയും സിനിമാ നിർമ്മാതാവുമായ സാന്ദ്രാ തോമസ് റോഡ് സുരക്ഷ പ്രതിജ്ഞ ചൊല്ലി കൊടുത്തു.
മൂവാറ്റുപുഴ നിർമല കോളേജിൽ നിന്ന് തുടങ്ങിയ ദീപശിഖാ പ്രയാണം നിർമലാ കോളേജ് പ്രിൻസിപ്പൽ കെ.വി.തോമസിൽ നിന്നും സെൻറ് തെരേസാസ് കോളേജ് ചെയർപേഴ്സൺ നിഖിത നായർ ഏറ്റുവാങ്ങി.
സർസ്റ്റ് (എസ്.ഐ.ആർ.എസ്.ടി) ഡയറക്ടർ ആദർശ് കുമാർ ജി നായർ സെമിനാർ അവതരിപ്പിച്ചു. സെന്റ് തെരേസാസ് കോളേജ് മാനേജർ സിസ്റ്റർ ഡോ. വിനിത അദ്ധ്യക്ഷത വഹിച്ച ചടങ്ങിൽ കോളേജ് പ്രിൻസിപ്പൽ അൽഫോൻസ വിജയാ ജോസഫ് , ഫസ്റ്റ് എയ്ഡ് സംഘടന പ്രസിഡന്റ് സനീഷ് കലൂക്കാടൻ, പെരുമ്പാവൂർ സബ് ആർടിഒ മോട്ടോർ വെഹിക്കിൾ ഇൻസ്പെക്ടർ ദിലീപ് കുമാർ, കോളേജ് വിദ്യാർത്ഥികൾ, അധ്യാപകർ തുടങ്ങിയവർ പങ്കെടുത്തു.