റോഡും വാഹനവും സുരക്ഷിതമായി കൈകാര്യം ചെയ്യാൻ ഡ്രൈവർമാരെ പ്രാപ്തരാക്കുന്ന തരത്തിലുള്ള ഡ്രൈവിംഗ് ടെസ്റ്റ് ട്രാക്കുകളും കർശനമായ പരീക്ഷാ രീതികളും നടപ്പാത്തിയത് വകുപ്പിന്റെ സുപ്രധാന നേട്ടമാണ്. ഇതിനൊപ്പം ലേണേഴ്സ് മൊബൈൽ ആപ്പ് തയ്യാറാക്കുന്നതും ഡ്രൈവിംഗ് ടെസ്റ്റുകളിൽ ഹസാർഡ് പെർസെപ്ഷൻ സിമുലേറ്റർ ടെസ്റ്റ് ഉൾപ്പെടുത്തുന്നതിനുള്ള നടപടികളും പുരോഗമിക്കുകയാണ്. ഇത് പുതിയ ഡ്രൈവർമാർക്ക് കൂടുതൽ മികച്ച പരിശീലനം നൽകാൻ സഹായിക്കും.

റോഡപകടങ്ങൾ ഗണ്യമായി കുറയ്ക്കാൻ ലക്ഷ്യമിട്ടുള്ള രാജ്യത്തെ ആദ്യത്തെ സമ്പൂർണ ഓട്ടോമേറ്റഡ് എൻഫോഴ്സ്മെന്റ് സംവിധാനത്തിന്റെ ഭാഗമായി, 2023 ജൂൺ 5-ന് കേരളത്തിലെ റോഡുകളിൽ എ.ഐ -പവേർഡ് ഉൾപ്പെടെ 726 ക്യാമറകൾ പ്രവർത്തനക്ഷമമാക്കി. അനധികൃതമായ വാഹന പാർക്കിംഗ്, മൊബൈൽ ഉപയോഗിച്ചുള്ള നിയമലംഘനങ്ങൾ മുതലായവ ക്യാമറകൾ നിരീക്ഷിക്കുന്നു. ട്രാഫിക് നിയമലംഘനം നടത്തുന്ന ഡ്രൈവർമാർക്ക് കമ്മ്യൂണിറ്റി സർവീസ് നൽകാനുള്ള സിലബസ് രൂപീകരിച്ചതും നിയമലംഘനങ്ങൾ ആവർത്തിക്കാതിരിക്കാനുള്ള ബോധവൽക്കരണത്തിന്റെ ഭാഗമാണ്. ഗുരുതരമായ നിയമലംഘനം നടത്തുന്നവരുടെ ലൈസൻസ് നിശ്ചിത കാലയളവിലേക്ക് റദ്ദാക്കുന്നതിനോടൊപ്പം അവർക്ക് കർശന പരിശീലനം നൽകുന്നതും റോഡ് സുരക്ഷയ്ക്ക് പ്രാധാന്യം നൽകുന്ന നടപടിയാണ്. സ്‌കൂൾ ബസുകളിലെയടക്കം വാഹന പരിശോധന കർശനമാക്കി.

സർക്കാരിന്റെ 100 ദിവസത്തെ കർമപരിപാടിയുടെ ഭാഗമായി പൊതുജനങ്ങൾക്ക് നേരിട്ട് നിയമ ലംഘനങ്ങൾ റിപ്പോർട്ട് ചെയ്യാൻ സിറ്റിസൺ സെന്റിനൽ ആപ്പ് സാധ്യമാക്കി ഇതിലൂടെ ട്രാഫിക് ലംഘനങ്ങൾ റിപ്പോർട്ട് ചെയ്യുക – പരാതി രജിസ്റ്റർ ചെയ്യുക എന്ന ഓപ്ഷൻ വഴി പൊതുജനങ്ങൾക്ക് ട്രാഫിക് വയലേഷൻസ് റിപ്പോർട്ട് ചെയ്യാൻ എം-പരിവാഹൻ ആപ്പിൽ സൗകര്യമൊരുക്കി. ഡ്രൈവിംഗ് ലൈസൻസ് പ്രിന്റ് നിർത്തലാക്കി, ഡിജിറ്റൽ ലൈസൻസ് കേരളത്തിൽ നടപ്പാക്കിയിട്ടുണ്ട്.

ഡൗൺലോഡ് യുവർ ഡ്രൈവിംഗ് ലൈസൻസ് (ഡി.വൈ.ഡി.എൽ) സംവിധാനത്തിലൂടെ ഡിജിറ്റൽ രൂപത്തിൽ ലൈസൻസ് സാരഥി വെബ്സൈറ്റിൽനിന്ന് ഡൗൺലോഡ് ചെയ്ത് ഉപയോഗിക്കാം.

റോഡ് സുരക്ഷ ഉറപ്പാക്കാനും റോഡപകടങ്ങൾ ഗണ്യമായി കുറയ്ക്കാനുമായി സുരക്ഷിത കേരളം പദ്ധതി നടപ്പാക്കി. ഇതിന്റെ ഭാഗമായി സംസ്ഥാനത്ത് 85 എൻഫോഴ്‌സ്‌മെന്റ് സ്‌ക്വാഡുകൾ രൂപീകരിച്ച് സജീവമായി പ്രവർത്തിക്കുന്നുണ്ട്. ഗതാഗത നിയമലംഘനങ്ങൾ കണ്ടെത്തുക, അപകട സാധ്യതയുള്ള സ്ഥലങ്ങൾ കണ്ടെത്തി പരിഹാരം നിർദേശിക്കുക, ട്രാഫിക് ബോധവൽക്കരണ ക്ലാസുകൾ സംഘടിപ്പിക്കുക, അപകടങ്ങൾ ഉണ്ടാകുമ്പോൾ അതിനുള്ള കാരണങ്ങൾ അന്വേഷിക്കുക എന്നിവയാണ് ഈ സ്‌ക്വാഡുകളുടെ ചുമതല.

ശബരിമല തീർത്ഥാടന കാലത്ത് റോഡ് സുരക്ഷ ഉറപ്പുവരുത്താനും സുഗമമായ തീർഥാടന അനുഭവത്തിനുമായി മോട്ടോർ വാഹന വകുപ്പ് ഉദ്യോഗസ്ഥരുടെ പിന്തുണയോടെ 24 മണിക്കൂറും പ്രവർത്തിക്കുന്ന സ്‌ക്വാഡുകൾ രൂപീകരിക്കുകയും പ്രവർത്തനങ്ങൾ ഏകോപിപ്പിക്കാൻ മൂന്ന് കൺട്രോൾ റൂമുകൾ സ്ഥാപിക്കുകയും ചെയ്തു. മെഡിക്കൽ സംഘങ്ങളുമായി സഹകരിച്ച് അപകടത്തിൽപ്പെട്ടവർക്ക് അടിയന്തര സഹായം എത്തിക്കുന്നതിൽ മോട്ടോർ വാഹന വകുപ്പ് പ്രധാന പങ്കുവഹിക്കുന്നു. ആദ്യമായി ആംബുലൻസുകളുടെ വാടക ചാർജുകളും, വെയ്റ്റിംഗ് ചാർജുകളും ഏകീകരിച്ചു.

മോട്ടോർ വാഹന വകുപ്പിനെ എല്ലാ സേവനങ്ങളും ഓൺലൈൻ ആക്കി. ഓഫീസ് കാര്യക്ഷമത വർദ്ധിപ്പിക്കാൻ ഒരു ഉദ്യോഗസ്ഥൻ അഞ്ച് ദിവസത്തിൽ കൂടുതൽ ഫയലുകൾ കൈവശം വയ്ക്കാൻ പാടില്ലെന്ന നിയമം നടപ്പാക്കി. ആറുവരി പാത സജ്ജമാകുന്നതിനു മുന്നോടിയായി ലെയ്ൻ ട്രാഫിക്ക് ബോധവൽക്കരണപരിപാടികൾ, ‘സേഫ്റ്റി ടു സേവ് ലൈഫ്’, അനധികൃത ഫിറ്റിങ്ങുകൾ കണ്ടെത്തുന്നതിനുള്ള സ്പെഷ്യൽ ഡ്രൈവ്, ഓപ്പറേഷൻ റാഷ്, ഓപ്പറേഷൻ ഡെസിബെൽ, ഓപ്പറേഷൻ നൈറ്റ് റൈഡേഴ്‌സ്, ക്‌ളിയർ പാത്ത്, സ്‌ക്രീൻ, സൈലൻസ്, ഫോക്കസ്, ഓപ്പറേഷൻ ഓവർലോഡ്, ആംബുലൻസുകളുടെ ദുരുപയോഗം, Route Curtail, തേർഡ് പാർട്ടി ഇൻഷുറൻസ് ഇല്ലാത്ത വാഹനങ്ങൾക്കെതിരെയുള്ള സ്‌പെഷ്യൽ ഡ്രൈവ് തുടങ്ങി നിരവധി സ്‌പെഷ്യൽ ഡ്രൈവുകൾ.

ഓരോ നിയമസഭാമണ്ഡലത്തിലെയും അഭിപ്രായങ്ങൾ കണക്കിലെടുത്ത് ഈ സർക്കാർ ആരംഭിക്കാനൊരുങ്ങുന്നത് 503 പുതിയ ബസ് റൂട്ടുകൾ. കേരള സ്റ്റാർട്ടപ്പ് മിഷനുമായി ചേർന്ന് ബസ് കൺസഷൻ ആപ്പ് വിദ്യാർഥികൾക്കായി വികസിപ്പിക്കുന്നു, റോഡ് സുരക്ഷാ സന്ദേശങ്ങൾ കാർട്ടൂൺ വീഡിയോകളായി വിദ്യാലയങ്ങളിലും പൊതുയിടങ്ങളിലും പ്രദർശിപ്പിക്കുന്നത് കുട്ടികളിലും പൊതുജനങ്ങളിലും അവബോധം വളർത്തും.

എ.എൻ.പി.ആർ ക്യാമറകളുള്ള വെർച്വൽ ചെക്ക് പോസ്റ്റുകൾ, സംസ്ഥാനത്ത് 19 ഓട്ടോമേറ്റഡ് ടെസ്റ്റിംഗ് സ്റ്റേഷനുകൾ, അക്രഡിറ്റഡ് ഡ്രൈവിംഗ് ട്രെയിനിംഗ് സെന്ററുകൾ, സർക്കാർ വാഹനങ്ങൾ രജിസ്റ്റർ ചെയ്യാ കെ.എൽ 90 എന്ന പ്രത്യേക സീരീസിനായുള്ള സോഫ്‌റ്റ്വെയർ എന്നിവ ഉടൻ യാഥാർത്ഥ്യമാകും. ഈ സർക്കാർ അധികാരത്തിലെത്തിയതോടെ പൊതുജനങ്ങൾക്ക് കൂടുതൽ മെച്ചപ്പെട്ട സേവനങ്ങൾ നൽകാനും റോഡ് സുരക്ഷ ഉറപ്പാക്കാനും ഗതാഗത സൗകര്യങ്ങൾ മെച്ചപ്പെടുത്താനുമാണ് വകുപ്പ് പരിശ്രമിക്കുന്നത്.