കൊല്ലം ജില്ലയിലെ തിരഞ്ഞെടുക്കപ്പെട്ട 150 എന് എസ് എസ് വോളന്റിയര്മാര്ക്കായി കൊട്ടിയം ക്രിസ്തു ജ്യോതിസ് ആനിമേഷന് സെന്ററില് നടന്നുവന്ന ഏഴ് ദിവസത്തെ ദുരന്തനിവാരണ പരിശീലന ക്യാമ്പ് ‘യുവ ആപ്ദാ മിത്ര’ സമാപിച്ചു. അഡീഷണല് ജില്ലാ മജിസ്ട്രേറ്റും ജില്ലാ ദുരന്തനിവാരണ അതോറിറ്റി ചീഫ് എക്സിക്യൂട്ടീവ് ഓഫീസറുമായ ജി നിര്മല്കുമാര് സമാപന സമ്മേളനം ഉദ്ഘാടനം ചെയ്തു. സമൂഹ അധിഷ്ഠിത ദുരന്തനിവാരണ പ്രവര്ത്തനങ്ങളില് യുവജന പങ്കാളിത്തം ശക്തിപ്പെടുത്തുക എന്ന ലക്ഷ്യത്തോടെ ദേശീയ -സംസ്ഥാന-ജില്ലാ ദുരന്തനിവാരണ അതോറിറ്റികള്, സംസ്ഥാന നാഷണല് സര്വീസ് സ്കീം എന്നിവ സംയുക്തമായാണ് ക്യാമ്പ് സംഘടിപ്പിച്ചത്.
ദുരന്തനിവാരണത്തിന്റെ അടിസ്ഥാന ആശയങ്ങള്, ദുരന്ത സാധ്യതകള് കുറയ്ക്കല്, തിരച്ചിലും രക്ഷാപ്രവര്ത്തനവും കാര്യക്ഷമമാക്കല്, പ്രഥമശുശ്രൂഷ, അടിയന്തര സഹായമെത്തിക്കല്, മുന്നറിയിപ്പ് സംവിധാനങ്ങള്, റോഡ് സുരക്ഷ, ആള്ക്കൂട്ട നിയന്ത്രണം, സന്നദ്ധ മനോഭാവ രൂപീകരണം, വ്യക്തത്വ വികസനം, ഒത്തൊരുമയോടെയുള്ള പ്രവര്ത്തനം തുടങ്ങി വിവിധ വിഷയങ്ങളില് ക്യാമ്പ് അംഗങ്ങള്ക്ക് പരിശീലനം നല്കി. അഗ്നിരക്ഷാ സേന, പോലീസ്, ആരോഗ്യം, ദുരന്തനിവാരണം, മോട്ടോര് വാഹന വകുപ്പുകള്, കുടുംബശ്രീ സ്നേഹിത ഹെല്പ് ഡെസ്ക്ക്, യൂണിസെഫ് തുടങ്ങി വിവിധ ഏജന്സികളിലെയും വിദഗ്ധരാണ് ക്ലാസുകള് നയിച്ചത്. ദുരന്തങ്ങളിലും മറ്റ് അടിയന്തര സാഹചര്യങ്ങളിലും പ്രാദേശിക – ജില്ലാ ഭരണകൂടങ്ങളെ സഹായിക്കാന് പ്രാപ്തരായ സന്നദ്ധ പ്രവര്ത്തകരെ പരിശീലിപ്പിച്ചെടുക്കുകയാണ് ക്യാമ്പിന്റെ ലക്ഷ്യം. പരിശീലനം പൂര്ത്തിയാക്കിയവര്ക്ക് ഐ.ഡി കാര്ഡ്, യൂണിഫോം, എമര്ജന്സി റസ്പോണ്സ് കിറ്റ് എന്നിവ വരും ദിവസങ്ങളില് ലഭ്യമാക്കും.
സമാപന യോഗത്തില് നാഷണല് സര്വീസ് സ്കീം ഡിസാസ്റ്റര് മാനേജ്മെന്റ് ട്രെയിനിംഗ് പ്രോഗ്രാം ജില്ലാ കോര്ഡിനേറ്റര് ഡോ. ജി ഗോപകുമാര് അധ്യക്ഷനായി. ദുരന്തനിവാരണ വിഭാഗം ജൂനിയര് സൂപ്രണ്ട് എം രമേശന്, നാഷണല് സര്വീസ് സ്കീം വിവിധ സെല്ലുകളുടെ ജില്ലാ ചാര്ജ് വഹിക്കുന്ന ജി സുരേഷ്, എ അരുണ്കുമാര്, ജി ആശ, ഡോ. ഇ മനു, ജില്ലാ ഹസാഡ് അനലിസ്റ്റ് പ്രേം ജി പ്രകാശ്, ഡിസാസ്റ്റര് മാനേജ്മെന്റ് പ്ലാന് കോര്ഡിനേറ്റര് എസ് മീനു തുടങ്ങിയവര് പങ്കെടുത്തു.