അതിജീവിക്കുന്ന കേരളത്തിന് സഹായഹസ്തവുമായി പ്രവാസിമലയാളി കുട്ടികളെത്തുന്നു. നവകേരളനിർമിതിയിൽ പുതുതലമുറ പ്രവാസിമലയാളികളെ പങ്കുചേർത്ത് മലയാളം മിഷൻ ഒരുക്കിയ ധനസമാഹരണ പദ്ധതിയായ ചങ്ങാതിക്കുടുക്കയുടെ ഭാഗമായാണ് വിവിധ ഇന്ത്യൻ സംസ്ഥാനങ്ങളിൽനിന്നുള്ള വിദ്യാർഥികൾ സഹായനിധിയുമായി കേരളത്തിലെത്തുന്നത്.

ചില്ലറത്തുട്ടുകളായും വിദേശനാണ്യങ്ങളായുമൊക്കെ ഓരോ മലയാളം മിഷൻ വിദ്യാർഥിയും വീടുകളിൽ സൂക്ഷിച്ച മൺകുടുക്കകളിലും പാത്രങ്ങളിലുമൊക്കെ കഴിഞ്ഞ ഒക്ടോബർ മുതൽ ശേഖരിച്ചുവച്ച പണമാണ് ചങ്ങാതിക്കുടുക്ക നിധിയായി മുഖ്യമന്ത്രിയുടെ ദുരിതാശ്വാസനിധിയിലേക്ക് സമർപ്പിക്കുന്നത്.  കേരളത്തിന് പുറത്ത് 10 ഇന്ത്യൻ സംസ്ഥാനങ്ങളിലും 15 വിദേശരാജ്യങ്ങളിലുമായി പ്രവർത്തിക്കുന്ന മലയാളം മിഷന്റെ 25000 ഓളം വിദ്യാർഥികളിൽ ഭൂരിപക്ഷം പേരും ചങ്ങാതിക്കുടുക്ക പദ്ധതിയിൽ പങ്കുചേർന്നിരുന്നു.

തിരുവനന്തപുരത്ത് ജനുവരി 25 മുതൽ 27 വരെയായി നടക്കുന്ന ത്രിദിന സഹവാസ ക്യാമ്പിൽ പങ്കെടുക്കുന്ന വിദ്യാർഥികൾ ചങ്ങാതിക്കുടുക്കയിലൂടെ തങ്ങൾ ശേഖരിച്ച തുക മുഖ്യമന്ത്രിക്ക് കൈമാറും. 25 ലക്ഷത്തോളം രൂപയാണ് വിദ്യാർഥികൾ സ്വന്തംനിലക്ക് ഈ സംരംഭത്തിലൂടെ സമാഹരിച്ചത്.

കേരളം നേരിട്ട മഹാപ്രളയത്തിനുശേഷം നടക്കുന്ന നവകേരള നിർമിതിയിൽ പങ്കുചേരാൻ പ്രവാസിമലയാളികളിലെ പുതിയ തലമുറയ്ക്കും ഒരവസരം നൽകണം എന്ന ചിന്തയാണ് ചങ്ങാതിക്കുടുക്കയിലേക്കു നയിച്ചതെന്ന് മലയാളം മിഷൻ ഡയറക്ടർ പ്രൊഫ. സുജ സൂസൻ ജോർജ്ജ് പറഞ്ഞു.

ചങ്ങാതിക്കുടുക്ക സമർപ്പണത്തോടനുബന്ധിച്ചു നടക്കുന്ന മൂന്നു ദിവസത്തെ സഹവാസ ക്യാമ്പിൽ 40 വിദ്യാർഥികളാണ് പങ്കെടുക്കുന്നത്. ഒൻപത് മുതൽ 14 വയസുവരെ പ്രായത്തിലുള്ള ആൺകുട്ടികളും പെൺകുട്ടികളും മലയാളം മിഷൻറെ ഡൽഹി, മുംബൈ, ചെന്നൈ, ബംഗലൂരു, തെലങ്കാന, ഗോവ എന്നിവിടങ്ങളിലെ വിവിധ പഠനകേന്ദ്രങ്ങളിലെ വിദ്യാർഥികളാണ്.

ജനുവരി 25 ന് വൈകുന്നേരം മൂന്നിന് തിരുവനന്തപുരം മാസ്‌കറ്റ് ഹോട്ടലിൽ നടക്കുന്ന ചടങ്ങിലാണ് ചങ്ങാതിക്കുടുക്ക മുഖ്യമന്ത്രിയുടെ ദുരിതാശ്വാസനിധിയിലേക്ക് സമർപ്പിക്കുന്നത്. മുഖ്യമന്ത്രി പിണറായി വിജയൻ ഉദ്ഘാടനം നിർവഹിക്കുന്ന ചടങ്ങിൽ സാംസ്‌കാരികകാര്യ വകുപ്പ് മന്ത്രി എ. കെ. ബാലൻ അധ്യക്ഷനാകും. റീബിൽഡ് കേരള സിഇഒ ഡോ. വി. വേണു, മജീഷ്യൻ ഗോപിനാഥ് മുതുകാട് എന്നിവർ വിദ്യാർഥികളുമായി സംവദിക്കും. കഴക്കൂട്ടം മരിയ റാണി കൺവെൻഷൻ സെൻററിൽ നടക്കുന്ന സഹവാസ ക്യാമ്പിൽ വിനോദസഞ്ചാര-സഹകരണ മന്ത്രി കടകംപള്ളി സുരേന്ദ്രൻ, വീണ ജോർജ് എംഎൽഎ തുടങ്ങിയവർ വിദ്യാർഥികളെ സന്ദർശിക്കും. വിദ്യാർഥികളുടെ ക്യാമ്പിനൊപ്പം വെൺപാലവട്ടത്തെ സമേതി കർഷക ഭവനത്തിൽ സമാന്തരമായി മലയാളം മിഷൻ അധ്യാപകരുടെയും രക്ഷിതാക്കളുടെയും ക്യാമ്പും നടക്കും.