തൃശ്ശൂർ: മതിലകം ഗ്രാമ പഞ്ചായത്തിലെ അഞ്ചാം വാർഡിൽ നിർമ്മിക്കുന്ന സാംസ്‌കാരിക നിലയത്തിനും ലൈബ്രറിക്കും തറക്കല്ലിട്ടു. എംഎൽഎ ഇ ടി ടൈസൺ മാസ്റ്ററുടെ ആസ്തി വികസന ഫണ്ടിൽ നിന്നും അനുവദിച്ച 60 ലക്ഷം രൂപ വിനിയോഗിച്ചാണ് കെട്ടിടം പണിയുന്നത്. മതിലകം കുരിക്കൾ വീട്ടിൽ സഫിയ സൗജന്യമായി നൽകിയ അഞ്ച് സെന്റ് സ്ഥലത്താണ് നിലയം നിർമ്മിക്കുന്നത്.

മൂന്ന് നിലകളിലായി നിർമ്മിക്കുന്ന നിലയത്തിൽ താഴെ പാർക്കിങ്ങ് സംവിധാനവും മുകളിൽ കമ്യൂണിറ്റി ഹാളും അതിന് മുകളിൽ വായനശാലയും എന്ന രീതിയിലാണ് പണി കഴിപ്പിക്കുന്നത്. എംഎൽഎ ഇ ടി ടൈസൺ മാസ്റ്റർ നിർമ്മാണോദ്ഘാടനം നിർവ്വഹിച്ചു. പഞ്ചായത്ത് പ്രസിഡന്റ് ഇ ജി സുരേന്ദ്രൻ അദ്ധ്യക്ഷത വഹിച്ച ചടങ്ങിൽ പഞ്ചായത്ത് മെമ്പർമാരായ ബിന്ദു സന്തോഷ്, വി എസ് രവീന്ദ്രൻ, കെ വൈ അസീസ് എന്നിവർ പങ്കെടുത്തു.