ജി.എസ്.ടി നടപ്പാക്കിയതിന് ശേഷമുള്ള  നികുതി ചോർച്ച പരിഹരിക്കാൻ പഠനം നടക്കുകയാണെന്ന് ധനമന്ത്രി കെ.എൻ ബാലഗോപാൽ പറഞ്ഞു. വാളയാർ വിൽപ്പന നികുതി ചെക്ക് പോസ്റ്റ് സന്ദർശിച്ച്  സംസാരിക്കുകയായിരുന്നു മന്ത്രി.  ജി.എസ്.ടി സംവിധാനം വന്നതിന് ശേഷം ചെക്ക് പോസ്റ്റുകളിൽ നിന്നുള്ള വരുമാനത്തേക്കാൾ നികുതി വരവിൽ  കാര്യമായ കുറവ് വന്നു. വൺ കൺട്രി വൺ ടാക്‌സ് സംവിധാനം അടിസ്ഥാനമായി പ്രവർത്തിക്കുന്ന സംവിധാനമാണ് ജി.എസ്.ടി.   പ്രതിവർഷം കേരളത്തിലേക്ക് 15000 കോടിയുടെ ചരക്കാണ് വരുന്നത്. 5000 കോടിയുടെ ചരക്ക് പുറത്തേക്കും പോകുന്നു എന്നാണ് ഏകദേശ കണക്ക്. ഇതിനനുസരിച്ചു സത്യസന്ധമായി നികുതി അടച്ചാൽ വരുമാനം കൂടും. ജി.എസ്.ടിക്ക് മുൻപ് ഓരോ വർഷവും 14 മുതൽ 16 ശതമാനം വരെ നികുതി വരവിൽ വർധന ഉണ്ടായിരുന്നു. എന്നാൽ ജി.എസ്.ടി നടപ്പാക്കി നാല് വർഷം കഴിയുമ്പോൾ വരുമാനം ആദ്യ വർഷത്തെതിനു തുല്യമാണ്.കോവിഡ് വന്നതോടെ വീണ്ടും വരുമാനം കുറഞ്ഞു. രാജ്യവ്യാപകമായി സംസ്ഥാനങ്ങളുടെ വരുമാനം കുറഞ്ഞതോടെ കഴിഞ്ഞ ജി.എസ്.ടി കൗൺസിൽ പദ്ധതി നടത്തിപ്പിലെ വീഴ്ചകൾ കണ്ടെത്താൻ വിവിധ സംസ്ഥാനങ്ങളിലെ മന്ത്രിമാരുടെ രണ്ട് സമിതികൾ ഉണ്ടാക്കി.    ജനങ്ങളിൽ നിന്ന് ഈടാക്കുന്ന നികുതി സർക്കാരിലേക്ക് നല്കിയെ മതിയാവൂ. കേരളത്തിൽ നിന്ന് പുറത്തേക്ക് പോകുന്ന ചരക്കുകൾ കൂടി നിരീക്ഷിക്കാൻ ക്യാമറ സംവിധാനം ഏർപ്പെടുത്തും. ഇപ്പോൾ കേരളത്തിന്  അകത്തേക്ക് വരുന്ന ചരക്കുകളാണ് കൂടുതൽ പരിശോധിക്കുന്നത്. ഫിസിക്കൽ വെരിഫിക്കേഷനിലെ കുറവ് നികത്തുമെന്നും മന്ത്രി അറിയിച്ചു.