അജൈവ പാഴ്‌വസ്തു ശേഖരണ രംഗത്ത് സ്മാർട്ടായി ചക്കുപള്ളം ഗ്രാമപഞ്ചായത്ത്. ഹരിത കർമ്മ സേനയുടെ നേതൃത്വത്തിൽ ചക്കുപള്ളം പഞ്ചായത്തിലെ വീടുകളില്‍ നിന്ന് ശേഖരിക്കുന്ന മാലിന്യങ്ങള്‍ എത്രയെന്നും അവ എങ്ങനെ സംസ്കരിക്കുന്നുവെന്നും മറ്റുമുള്ള വിവരങ്ങള്‍ ഇനി മൊബൈല്‍ ഫോണിലൂടെ അറിയാൻ കഴിയും. സ്മാർട്ട് ഗാർബേജ് മൊബൈൽ ആപ്പ് ഉപയോഗിച്ച് ക്യൂആർ കോഡിന്റെ സഹായത്തോടെ വിവരങ്ങൾ ശേഖരിക്കുന്ന സംവിധാനമാണ് തയ്യാറായത്. ഇതിന്റെ ഭാഗമായി പഞ്ചായത്തിൽ ക്യൂ ആർ കോഡ് പതിക്കുന്ന പ്രക്രിയ ആരംഭിച്ചു. ചക്കുപള്ളം പഞ്ചായത്ത് തല ഉദ്ഘാടനം ഗ്രാമപഞ്ചായത്ത് പ്രസിഡന്റ് പി. കെ. രാമചന്ദ്രൻ നിർവഹിച്ചു.
അജൈവ പാഴ്‌വസ്തു ശേഖരണ പ്രക്രിയ ഊർജ്ജിതമാക്കാനും മാലിന്യ നിർമ്മാർജ്ജന പ്രവർത്തനങ്ങൾ കാര്യക്ഷമവും കുറ്റമറ്റതുമാക്കാനുമാണ് ഹരിതകേരളം മിഷന്റെയും ശുചിത്വ മിഷന്റെയും ആഭിമുഖ്യത്തിൽ സ്മാർട്ട് ഗാർബേജ് മൊബൈൽ ആപ്പ് പദ്ധതി നടപ്പിലാക്കിയത്. വാർഡുകളിലെ ഓരോ വീട്ടിൽ നിന്നും ശേഖരിച്ച ജൈവ‑അജൈവ പാഴ്‌വസ്തുക്കൾ എത്രയെന്നും, അവയുടെ സംസ്കരണം എങ്ങനെയെന്നുമടക്കമുള്ള വിശദാംശങ്ങൾ മൊബൈൽ ആപ്ലിക്കേഷനിലൂടെ മനസിലാക്കാനും കൈകാര്യം ചെയ്യാനും സാധിക്കും. വീടുകളില്‍ എത്തുന്ന ഹരിത കര്‍മ്മ സേനാംഗങ്ങള്‍ അതത് വീടുകളില്‍ സ്ഥാപിച്ച ക്യൂആര്‍ കോഡ് സ്‌കാന്‍ ചെയ്ത് വിവരങ്ങള്‍ ശേഖരിക്കും. ഹരിത കർമ്മ സേന അംഗങ്ങൾ എത്താത്ത വീടുകളും മാലിന്യം ശേഖരിക്കാത്ത വീടുകളും എല്ലാം ഇതിലൂടെ കണ്ടെത്താനാകും. ക്യു ആർ കോഡ് സ്കാൻ ചെയ്ത് പരാതികളും നിർദ്ദേശങ്ങളും അറിയിക്കാനും ഗുണഭോക്താക്കൾക്ക് കഴിയും. ഓരോ സ്ഥലത്തു നിന്നും ശേഖരിച്ച പാഴ് വസ്തുക്കളുടെ അളവും അവ സംസ്‌കരിച്ചതിന്റെ കണക്കുകളും ആപ്പിലൂടെ കൃത്യമായി രേഖപ്പെടുത്തുന്നത് വഴി എല്ലാ തദ്ദേശസ്വയംഭരണ സ്ഥാപനങ്ങള്‍ക്കും ബന്ധപ്പെട്ട സംസ്ഥാനതല ജില്ലാതല സര്‍ക്കാര്‍ സംവിധാനങ്ങള്‍ക്കും പാഴ് വസ്തു ശേഖരണ സംസ്‌കരണ പ്രവര്‍ത്തനങ്ങളുടെ പുരോഗതി അറിയാന്‍ കഴിയും.
സ്റ്റാൻഡിങ് കമ്മിറ്റി ചെയർപേഴ്സൺമാരായ ബിന്ദു അനിൽകുമാർ, ആഷ സുകുമാർ, പഞ്ചായത്ത് അംഗങ്ങളായ വി. ജെ. രാജപ്പൻ, ജോസ് പുതുമന, സൂസൻ മാത്യു, ആന്റണി കുഴിക്കാട്ട്, സുരേന്ദ്രൻ മാധവൻ, അന്നക്കുട്ടി വർഗീസ്, മറിയാമ്മ ചെറിയാൻ, കുടുംബശ്രീ ചെയർപേഴ്സൺ ബീന ബിസി, വി.ഇ.ഒ മാരായ റീനാമോൾ ചാക്കോ, രേണുക പി. പി.,ഹരിത കർമ്മ സേന അംഗങ്ങൾ തുടങ്ങിയവർ പങ്കെടുത്തു.