മാലിന്യമുക്തി, ഭവന നിര്മാണം, ദാരിദ്ര്യ നിര്മാര്ജനം, നൂതന പദ്ധതികള് തുടങ്ങി എല്ലാ വികസന നേട്ടങ്ങളും ജനസമക്ഷം അവതരിപ്പിക്കുന്ന തദ്ദേശ സ്ഥാപനതല വികസന സദസുകള്ക്ക് 20ന് തുടക്കമാകുമെന്ന് സംഘാടകസമിതി അധ്യക്ഷനായ ജില്ലാ പഞ്ചായത്ത് പ്രസിഡന്റ് ഡോ. പി.കെ. ഗോപന്. വികസന സാക്ഷ്യങ്ങളായി ചിത്ര-ലഘുചലച്ചിത്ര പ്രദര്ശനവും സംഘടിപ്പിക്കുമെന്ന് കോ-ചെയര്മാനായ ജില്ലാ കളക്ടര് എന്. ദേവീദാസിന്റെ അധ്യക്ഷതയില് ചേര്ന്ന യോഗത്തില് അറിയിച്ചു.
നാളിതുവരെയുള്ള നേട്ടങ്ങള് തദ്ദേശസ്ഥാപന ഭാരവാഹികളും പ്രവര്ത്തനത്തിന്റെ പ്രോഗ്രസ് റിപോര്ട്ട് സെക്രട്ടറിമാരും അവതരിപ്പിക്കും. അത് ചര്ച്ച ചെയ്ത് തുടര് പ്രവര്ത്തനങ്ങള്ക്ക് രൂപം നൽകും. വികസനത്തിന് വിനിയോഗിക്കാന് 28 ശതമാനം പണവും സര്ക്കാര് നല്കുന്നത് തദ്ദേശസ്ഥാപനങ്ങള്ക്കാണെന്നതുകൊണ്ട് ഗൗരവതരമായ ചര്ച്ചകള് നടത്തി ഭാവി വികസന നിര്ദേശങ്ങള്ക്ക് വഴിയൊരുക്കണമെന്നും പറഞ്ഞു.
ജനങ്ങള്ക്ക് വിവിധ സേവനങ്ങള് സംബന്ധിച്ച വിവരങ്ങള് നല്കുന്നതിനും സംശയ നിവാരണത്തിനുമായി ഹെല്പ് ഡെസ്കുകളും സദസുകളുടെ ഭാഗമാകുമെന്ന് ജില്ലാ കളക്ടര് വ്യക്തമാക്കി. കണ്വീനറായ തദ്ദേശ സ്വയംഭരണ വകുപ്പ് ജോയിന്റ് ഡയറക്ടര് എസ്. സുബോധ് കുമാര്, ഡെപ്യൂട്ടി ഡയറക്ടര് ബി. അജയകുമാര്, ബ്ലോക്ക്- ഗ്രാമപഞ്ചായത്ത് പ്രസിസന്റുമാര് തുടങ്ങിയവര് പങ്കെടുത്തു.