വെള്ളയിൽ ബീച്ചിലെ 19 മത്സ്യത്തൊഴിലാളി കുടുംബങ്ങൾ ഇനി സ്വസ്ഥമായി അന്തിയുറങ്ങും. വർഷങ്ങളായി പട്ടയം കിട്ടാതിരുന്ന ഈ കുടുംബങ്ങൾ ജൂബിലി മിഷൻ ഹാളിൽ നടന്ന പട്ടയമേളയിലാണ് റവന്യൂ ഭവന നിർമ്മാണ വകുപ്പ് മന്ത്രി കെ. രാജനിൽ നിന്ന് പട്ടയം ഏറ്റുവാങ്ങിയത്.

നാല് സെന്റ് വരെയുള്ള ഭൂമിക്കാണ് പട്ടയം നൽകിയത്. പലവിധ കാരണങ്ങളാലാണ് ഈ കുടുംബങ്ങൾക്ക്‌ പട്ടയം ലഭിക്കാതിരുന്നത്. പട്ടയം സ്വീകരിച്ച് മന്ത്രിക്കൊപ്പം ഫോട്ടോയുമെടുത്താണ് ഇവർ മടങ്ങിയത്. മത്സ്യത്തൊഴിലാളികളായ ബഷീറിനും ഹനീഫക്കുമെല്ലാം പങ്കുവെക്കാനുള്ളത് ഹൃദയം നിറഞ്ഞ സന്തോഷം. റവന്യൂ വകുപ്പും സർക്കാരും നൽകിയ സഹായത്തിനും സന്തോഷത്തിനും നന്ദി പറയുകയാണ് വെള്ളയിൽ ബീച്ചിലെ 19 കുടുംബങ്ങളും.