ഹരിത കേരളം മിഷന്റെ ആഭിമുഖ്യത്തിൽ സംസ്ഥാനത്ത് സ്ഥാപിച്ച പച്ചത്തുരുത്തുകളിൽ മികച്ചവയെ കണ്ടെത്തുന്നതിനുള്ള സ്ക്രീനിംഗ് തിരുവനന്തപുരത്ത് പൂർത്തിയായപ്പോള് ജില്ലയിലെ അഞ്ച് പച്ചത്തുരുത്തുകൾക്ക് ജില്ലാതല പുരസ്കാരം. തദ്ദേശസ്വയംഭരണതലം, വിദ്യാലയം, ദേവഹരിതം, മറ്റ് സ്ഥാപനതലം എന്നീ വിഭാഗങ്ങളിലായാണ് ജില്ലയിലെ വിവിധ പച്ചത്തുരുത്തുകൾ നേട്ടം സ്വന്തമാക്കിയത്.
തദ്ദേശസ്വയംഭരണ സ്ഥാപനതലത്തിൽ മാവേലിക്കര-താമരക്കുളം (കോട്ടക്കാട്ട്ശ്ശേരി ആറാം വാർഡിൽ ലെപ്രസി സാനിറ്റോറിയത്തിലെ പ്രദർശനത്തോട്ടം), ഭരണിക്കാവ് (വില്ലേജ് ഓഫീസ് പച്ചത്തുരുത്ത്) എന്നിവ ജില്ലാതലത്തിൽ യഥാക്രമം ഒന്ന്, രണ്ട് സ്ഥാനങ്ങൾ നേടി. വിദ്യാഭ്യാസ വിഭാഗത്തിൽ ചെന്നിത്തല തൃപ്പെരുംതുറ പഞ്ചായത്തിലെ ജവഹർ നവോദയ വിദ്യാലയവും, ദേവഹരിതം വിഭാഗത്തിൽ പുന്നപ്ര മാർഗ്രിഗോറിയസ് പള്ളിയും, മറ്റ് സ്ഥാപനങ്ങളുടെ വിഭാഗത്തിൽ ആലപ്പുഴ കെഎസ്ഡിപി എന്നിവയുമാണ് പുരസ്കാരത്തിന് അര്ഹമായത്.
പുരസ്കാര വിതരണം സെപ്റ്റംബർ 16ന് തിരുവനന്തപുരം ടാഗോർ തിയേറ്ററിൽ നടക്കുന്ന ചടങ്ങിൽ മുഖ്യമന്ത്രി പിണറായി വിജയൻ നിർവഹിക്കും.