കൊച്ചി: ജില്ലാ ഫുട്ബോൾ അസോസിയേഷൻ പ്രസിഡന്റായി അഡ്വ.പി.വി.ശ്രീനിജിനെ തെരഞ്ഞെടുത്തു. കലൂർ നെഹൃ സ്റ്റേഡിയത്തിലുള്ള ഫുട്ബോൾ അസോസിയേഷൻ ഓഫീസിൽ നടന്ന യോഗത്തിൽ ഐകകണ്ഠ്യേനയാണ് പുതിയ ഭാരവാഹികളെ തെരഞ്ഞെടുത്തത്. മറ്റ് ഭാരവാഹികളായി സി.സി.ജേക്കബ്, ആർ. ദിനേശ് കമ്മത്ത്, കെ.ഗോകുലൻ, വി.പി. ചന്ദ്രൻ ( വൈസ് പ്രസിഡന്റുമാർ), കെ.കെ. മുരളീധരൻ ( സെക്രട്ടറി), എം.കെ. പ്രഹ്ളാദൻ, എസ്.എസ്. നൗഷാദ് (ജോയിന്റ് സെക്രട്ടറിമാർ), സോളി സേവ്യർ (ട്രഷറർ) എന്നിവരെയും തെരഞ്ഞെടുത്തു. ഇതിന് പുറമെ ഏഴംഗ എക്സിക്യൂട്ടീവിനെയും തെരഞ്ഞെടുത്തിട്ടുണ്ട്. യോഗത്തിൽ സംസ്ഥാന സ്പോർട്സ്സ് കൗൺസിലംഗം ജോർജ് തോമസ് നിരീക്ഷകനായി. പുതിയ പ്രസിഡന്റായി തെരഞ്ഞെടുക്കപ്പെട്ട പി.വി. ശ്രീനിജിൻ നിലവിൽ ജില്ലാ സ്പോർട്സ് കൗൺസിൽ പ്രസിഡന്റുകൂടിയാണ്. നാല് വർഷമാണ് ഭരണസമിതിയുടെ കാലാവധി. കോൺഗ്രസ് നേതാവും മുൻ മന്ത്രിയുമായ കെ.ബാബു വായിരുന്നു കഴിഞ്ഞ 16 വർഷമായി ജില്ലാ ഫുട്ബോൾ അസോസിയേഷന്റെ പ്രസിഡന്റ്.

ഫോട്ടോ അടിക്കുറിപ്പ്:

ജില്ലാ ഫുട്ബോൾ അസോസിയേഷൻ പ്രസിഡന്റായി തെരഞ്ഞെടുക്കപ്പെട്ട അഡ്വ.പി.വി.ശ്രീനിജിൻ.